Footer

3 natay, 4 nadundunor iti nagsisina aksidente ti lugan

STA. MARIA, Ilocos Sur – Tallo manen ti natay idinto nga uppat ti nadundunor iti tallo a nagsisina nga aksidente iti dalan a napasamak iti Sto. Domingo, Magsingal ken ditoy nga ili itay nabiit.

Iti aksidente iti Sto. Domingo, naireport a natay da Edmar Tabuniar y Tabag, 41, naasawaan ken ni Junior Urbien y Oandasan, 18, baro, agpada a residente ti Barangay Bungro, Magsingal, gapu iti pannakaaksidente ti luganda iti national highway ti Barangay Parada, Sto. Domingo idi agarup alas 4 ti malem ti Mayo 15.

Naammuan iti inbestigasion nga agpaamianan ti lugan dagiti biktima ngem mapapati a kimmaut daytoy iti bangir a linia ti kalsada a puon ti nakidinnungparanna iti maysa a di nainaganan a lugan.

Dead on the spot ni Tabuniar idinto a saanen a naiyabot ti biag ni Junior iti Metro Vigan Cooperative Hospital a nakaitarayanna.

Iti sabali a damag, nagreport iti polis ti Magsingal ni Reynaldo Lardizabal y Ligado, 43, naasawaan, ken residente ti Barangay Cabungaan, Laoag City nga aksidente a nakadungpar iti motorsiklo idi agarup alas 10:30 ti rabii ti Mayo 12 iti national highway a sakup ti Barangay Bungro, Magsingal.

Nasarakan dagiti nagresponde a polis ti biktima a ni Aluna Talania y Malapit, 27, naasawaan ken residente iti Barangay Bungro, Magsingal a naipasirok iti truck a minaneho ni Lardizabal ket naideklara a natayen idi maitaray iti Magsingal District Hospital.

Nakaro ti dadael ti Yamaha motorbike ti biktima idinto a nagsagrap iti dadael ti makannawan a sango a flasher ti truck.

Kabayatanna, nadunor dagiti nagmaneho iti traysikel ken motorsiklo ken maysa a pasahero iti aksidente a napasamak iti provincial road ti Barangay Baliw Daya, ditoy nga ili idi agarup alas 2:50 ti malem ti Mayo 15.

Nagaradgadan ti makannigid a saka da Reymart Antonio y Gonzales, 14, ken residente iti Sitio Bagong Barrio, Barangay Poblacion Sur, ken Cesar Rapanut y Dasalla, 44, naasawaan, residente iti Barangay Nagtupacan ngem naitaray iti Sto. Niño Hospital ni Edna Dasalla para iti pannakataming ti sugatna iti ulo.

Segun iti report, agpaabagatan ti traysikel a minaneho ni Rapanut ken ti motorsiklo a minaneho ni Antonio ket inobertekan ti motorsiklo ti traysikel ngem nasapgidna daytoy ket dinungpar ti motorsiklo ti Toyota Innova a nakaparking iti abaga ti kalsada ken nagbaliktadan ti traysikel.#