3 natay iti aksidente, 2 nasugatan iti aksidente

CANDON CITY РNatay ti tallo a lallaki a nagkakalubbon iti motorsiklo idinto a nasugatan dagiti naglugan iti traysikel a kinadungparda  iti sanguanan ti maysa a mall ditoy siudad idi alas dies ti rabii ti Nobiembre 19.

Saanen a naiyabut iti Candon City Hospital ti biag da Rixson Galdones y Gadia, 20,  ken Mar Galao y Toquero, 26, agpada a residente iti Barangay Parioc Primero ditoy siudad idinto a pimmusay bayat ti pannakataming dagiti sugatna ni Jerry Abellon, 22, baro, kalugaranda met laeng.

Naideklara nga awanen ti pagpeggadan ti biag ni Dominador Galima y Acena, 47, residente iti Oaig Daya, Galimuyod, drayber ti traysikel   a Honda TMX, ngem naiyalis ti inluganna a ni Rogelio Ballocanag, 40, baro, kalugaranna met laeng, iti ITRMC, San Fernando City gapu kadagiti grabe a sugatna.

Segun iti inisial nga inbestigasion dagiti polis, agpada nga agpaamianan ti traysikel a minaneho ni Galima ken ti Viron bus a minaneho ni Bernard Nebres y Maqui ket  idi addadan iti national highway a sakup ti Barangay Oaig Daya ditoy siudad, iti mismo a sanguanan ti Stern Mall, inobertekan ti traysikel ti bus ngem nakasabatna ti Euro motorcycle a minaneho ni Abellon a nakaigapuan ti panagdinnungparda.

Gapu iti pigsa ti panagdinnungpar dagiti lugan, naipuruak amin dagiti biktima ket naatalan ti bus ni Galao ken naiguyod iti sirok ti makannigid a sango a pilid.

Inalut-ot dagiti immarayat a tattao ni Galao ket idi simmangpet dagiti nagresponde a polis, naitaray amin dagiti biktima iti Candon City Hospital.

Boluntario a simmuko ti drayber ti Viron bus kadagiti polis.#