3 natay iti aksidente ti lugan

SAN JUAN, Ilocos Sur – Tallo a tattao ti natay idi nainbolbar ti luganda iti aksidente sadiay Candon City ken ditoy a siudad idi Disiembre 20.

Naireport a natay da Rogelio Agrisola, Sr., y de Peralta, 57, naasawaan ken Christopher Garcia y Gabor, iti aksidente a napasamak sadiay Candon City, ken ni Reynalyn Argel y Veracion, 41, iti met aksidente sadiay San Juan, Ilocos Sur nga agpada a napasamak idi Disiembre 20.

Segun iti report manipud iti kapolisan ti Candon City, tallo a lugan, maysa a top-down tricycle, maysa a kotse, ken bus ti nainbolbar iti aksidente a napasamak iti Barangay Balingaoan iti nadakamat a petsa.

Iti panagimbestiga dagiti polis, agdaldaliasat ti top-down tricycel (kurong-kurong) a minaneho ni Agrisola iti kurbaan ti amianan a sungaban ti rangtay idi sinapgid ti agpaamianan a Toyota Fortuner a minaneho ni Jolette Emylene Carpio y Fontanilla, 44, naasawaan, nurse ket gapu iti pigsa ti impact, napukaw ni Agrisola ti kontrolna iti manibela ket naturong ti luganna ti bangir a kalsada a nagresulta iti panagdinnungparda iti Florida Bus a minaneho ni Leo Mariano y Ganitano, 34, residente iti Barangay 20, Sarrat, Ilocos Norte.

Nagsagrap ni Agrisola ken ti naglugan iti kurong-kurong a ni Christopher Garcia y Gabor, baro, ken residente iti Barangay San Agustin, Candon City, iti nakaro a dunor iti ulo ken paset ti bagida.

Naitaray dagiti dua iti Candon General Hospital ngem naideklara ni Agrisola, Sr. a dead on arrival. Naiyalis ni Garcia iti Ilocos Regional Training and Medical Center ngem pimmusay bayat ti kaaddada iti dalan.

Pirmi a nadadael ti kurong-kurong; nagsagrap ti Toyota Fortuner iti kuppil ken gurad iti makannigid a sikiganna, kannigid a likud a ridaw ken likud a bumper; idinto a nagsagrap ti bus iti dadael iti sango a windshield.

Kabayatanna, sadiay Barangay Lapting, San Juan, Ilocos Sur ti nakapasamakan ti aksidente idi agarup 5:55 ti bigat ti Disiembre 20 a nakainbolbaran ti maysa nga Isuzu Elf a minaneho ti Rudy Argel y Alcausin, 45, residente iti Barangay Refaro, San Juan, ken Honda Wave motorcycle a minaneho ni Alberto Dizon y Perez, 37, ken residente iti 122 San Jose, Urdaneta, Pangasinan.

Iti panagpalutpot dagiti inbestigador, agpada nga agpaamianan a direksion ti motorsiklo ken ti Elf, idi dinungpar ti naudi ti kutit ti motorsiklo a puon ti nakaipalladawan da Argel ken dagiti insakayna a nabigbig iti nagan a Reynalyn Argel y Veracion, 41, ken ni Jaypee Argel y Veracion, 9.

Naitaray dagiti biktima iti Pira Clinic and Hospital iti Cabugao, Ilocos Sur ngem pimmusay ni Reynalyn bayat ti pannakaag-agasna.

Pinadas ti Dizon a libasan dagiti nadungparna ngem nangipatulod dagiti polis-San Juan iti flash alarm kadagiti kabangibangda a police stations ket sinaed dagiti polis-Cabugao ti suspek sada tiniliw ken impaima iti polis ti San Juan para iti umisu a disposision.#