SANTIAGO, Ilocos Sur – Maysa nga aldaw kalpasan ti aksidente a nakatayan ti maysa a baro ken nakasugsugatan dagiti pasahero ti maysa a bus sadiay Barangay Bulbulala, sabali manen nga aksidente ti napasamak sadiay Barangay Imus ditoy nga ili idi Mayo 17 a nakatayan ti maysa a lakay.
Segun iti report manipud iti polis ditoy nga ili, natay ti maysa a managan Violeto Elefante, Sr., 73, kalpasan a dinungpar ti Mitsubishi Montero iti national highway a sakup ti Barangay Imus idi agarup alas 9:00 ti rabii ti nadakamat a petsa.
Nainaganan ti drayer ti kotse a ni Noriel Flores, 38, ken residente iti Pag-asa Street, Caloocan City.
Naammuan iti inisial nga inbestigasion a bumallasiw koma ti biktima iti kalsada ngem nasapgid ti limmabas a kotse.
Naitaray ti biktima iti Candon General Hospital sa iti San Fernando City, La Union ngem saanen a naidanon a sibibibiag pay.
Simmuko ni Flores iti Candon City police station.
Daytoy ti maikatlo nga aksidente a napasamak iti kalsada nasional ditoy nga ili iti las-ud ti uppat nga aldaw.
Idi Mayo 14, natay ni Remedios Escritor, residente iti Barangay Bulbulala, kalpasan a dinungpar ti maysa nga Isuzu Forward.
Iti Mayo 16, natay ni Joel Vez, 24, gapu iti pannakapandagna iti bus bayat ti pannagnana ti pagkurbaan ti national highway a sakup ti Barangay Bulbulala ken nakasugatan dagiti 26 a pasahero.
Ti kinagalis ti kalsada ti maitudo a puon ti aksidente.
Iti inisial a panagimbestiga ti polis, naammuan nga agpa-Bangued ti Dominion Bus a minaneho ni Raymundo Ulpindo, 42, ken residente iti Barangay Caculangan, San Juan, La Union, idi mapapati a di nakontrol ti drayber ti manibela ti lugan gapu iti kinagalis ti kalsada a nagresulta iti panagiwes ti bus sana dinungpar ti konkreto a marker ken poste ti koriente sa napattog a nakapandagan ni Vez a magmagna iti dayta a darikmat iti igid ti kalsada.
Naitaray iti Candon General Hospital dagiti nasugatan a pasahero a nakairamanan da Rosalinda Gay-ad Dario ti Abra, Noemi Balanay Grapisa ti Peñarubia, Abra; Marilou Magbual Garid iti Culiat, Talogtog, Nueva Ecija; Leonida Catriz iti Bangued, Abra; Fermin Pascual iti San Quintin, Abra; Laurito Llanesa iti Abra; Maryjoy Calibuso Hidalgo ken Ma. Catalina Calibuso Hidalgo iti Butir, Santa Maria; Michael Perez iti Bagar, Candon City; Aprilyn Decano Pascua ken Christine Cablas Decano iti Burgos, Ilocos Sur; Caridad Llanez Gonzalez ken Loreto Llaneza Acavanza iti Danglas, Abra; Dexter Baldan Boone ken Mark Anthony Baldan Ballala iti Bucay, Abra; Miguel Dasalla iti Munoz, Nueva Ecija; Ireneo Beralde Valena iti Ayusan, Santa Lucia; Brian Masilley Lundang iti Bangued, Abra ken Adelvic Christianne Tereza Cutler iti Pidigan, Abra.
Naitaray met iti Candon City Hospital dagiti dadduma a pasahero a nakaibilangan da Charlie Caray Cagain iti San Juan, Abra;Â Antonette Bayugo Ballo iti Bangued, Abra;Â Juliet Sanidad Veronilla iti Danglas, Abra; Florence Vernal iti Dallangigan, Abra; ken Antonio Isabelo ken Rodelyn Caray iti San Juan, Abra.
Segun iti polis, masansan ti aksidente iti daytoy a paset agsipud ta nagalis ti kalsada nangruna no kalkalpas ti tudo.#