CANDON CITY – Malas dagitoy a lallaki ta lugan pay met ti polis ti pinanggepda a takawan iti gasolina.
Natiliw iti akto nga agtaktakaw iti gasolina ti motorsiklo ni PO1 Godoy, polis a nakadestino iti police station ditoy siudad, da Nestor Dawi, 18, ken residente iti San Tiburcio, Salcedo, Ilocos Sur; Andy Gaburno, 18, residente iti Cervantes, Ilocos Sur; ken Jonathan Galletes Bitaga, 22, residente iti Itogon, Benguet.
Segun iti report, nasiputan ida ni PSI Providencio Calibuso, deputy chief of police ditoy siudad, nga akto nga agiyal-alis iti gasolina manipud iti motorsiklo ni Godoy.
Kinuna dagiti suspek a naawanan ti gasolina ti motorsikloda isu a nagtakawda iti gasolina a karga ti lugan ti polis.#