CABUGAO, Ilocos Sur – Kasapulan ti naparpardas a pagkamat kadagiti agisaysayangkat iti illegal a panagkalap tapno mapasardeng ti panagbongbong iti probinsia.
Limtuad daytoy a problema kalpasan a nakalibas dagiti tallo a lalaki a nasalamaan dagiti polis a nagkalap iti kabaybayan itay nabiit.
Bayat ti airborne a panagpatroliada idi agsapa ti Nobiembre 6, tallo a lalaki ti nasalamaan dagiti polis ken kameng of Fisheries and Aquatic Resources nga agkalkalap babaen iti illegal a wagas iti kabaybayan iti nagbeddengan ti Sinait ken daytoy nga ili.
Sinadaan dagiti polis ti motorized banca a nagmarka iti Ydarj a nagluganan da Reno Rafanan, Ronald Ines and Edison Ines, residenteda iti Barangay Teppeng, Sinait, Ilocos Sur, ket kinumpiskada dagiti ikan a mapapati a kinalapda babaen iti bongbong.
Ngem bayat ti panagpalutpot dagiti polis, kellaat a pinasayag dagiti suspek ti bangkada a nagpaamianan.
Kinamat dagiti otoridad dagiti suspek ngem saandan a nakamatan dagitoy.#