3 pagtaengan, sinerrek mannanakaw

VIGAN CITY – Kalpasan ti pannakatakaw ti maysa a pawnshop ditoy siudad, tallo a pagtaengan ti nagsasaruno a naserrek a nakakurimesan dagiti kuarta ken sanikua dagiti bumalay.

Kaudian a naireport a natakawan ti maysa a pagkaseraan ditoy siudad idi agarup 12:30 ti malem ti Nobiembre 7 babaen ti biktima a managan Remy Andres y Ramilo, 33, balasang, ken residente iti Barangay Nagtupacan, Sta. Maria, Ilocos Sur ngem agkaskasera iti Barangay I ditoy.

Nagreport ni Andres a natakawan ti kaserana ket intaray dagiti mannanakaw ti selponna a Nokia 1110 nga agpateg iti P4,350.00, maysa a balitok a singsing nga agbalor iti P1,500, maysa a balitok a kuentas nga agpateg iti P1,350, maysa a balitok a pulseras nga agpateg iti P750.00 ken nagduduma a foreign currencies a di pay ammo ti kadagupanna.

Segun iti biktima, idi agarup 10:30 iti bigat ti nadakamat a petsa, pinanawanna ti kuartona ket napan naglako iti natnateng ngem idi nagsubli, naduktalanna laengen a nakalukat ti ridaw ti kuartona ken awanen ti selponna nga inkabilna iti rabaw ti katrena ken dagiti alahasna nga indulinna iti lamisaanna, kasta met ti di pay ammo a dagup dagiti kuarta.

Sinuspetsa ti biktima a maysa met nga agkaskasera iti nasao a balay ti nagtakaw nga innagananna a maysa a Loreto Macanas, Jr. y Paco, 29, baro, ken taga-Bulacan.

Iti panagsukisok dagiti polis iti kuarto ti suspek iti imatang dagiti opisial ti barangay ken babaen ti pammalubos ti suspek, nasukainanda dagiti nagduduma a foreign currencies iti kuarta daytoy.

Naipaiman ti kaso a robbery maikontra iti suspek iti opisina ti city prosecutor ti Vigan City.

Idi rabii ti Nobiembre 5, sinerrek dagiti mannanakaw ti balay ti maysa nga abogado ket kinasakasda dagiti alahas, selpon ken assorted a sensilio.

Natakawan ti balay ni Atty. Angelito Eder y Bajet, 45, naasawaan, ken residente iti Barangay Tamag, Vigan City ket intarayda dagiti assorted nga alahas nga agpateg amin iti P500,000.00, dua a selpon a Nokia nga agpateg iti P5,000.00 ken assorted coins.

Naammuan iti panagimbestiga dagiti polis a pimmanaw dagiti biktima idi agarup 5:30 ti malem ti Nobiembre 5 ket idi nagsublida iti agarup 10:30 ti rabii iti dayta met la a petsa, naduktalanda laengen a naporsar a naluktan ti kabinet a nakaikabilan dagiti alahas ken coins. Intaray pay dagiti mannanakaw dagiti dua a selpon a pinanawanda a naka-charge.

Sinerrek met dagiti mannanakaw idi rabii ti Nobiembre 3 ti kasera ti maysa nga ahente a masarakan iti Barangay IV, Vigan City ket kinasakasda ti relona, selpon, ken laptopna nga agbalor amin iti nakurang a P50,000.00.

Nagreport ni Edgar Valle y Saliling, 33, baro, medical representative ti Jousen Trading Company ken residente iti Bonuan, Dagupan City a nata-kaw iti Arellano Apartment a kaserana ti relona nga agpateg iti P6,000.00, ti laptopna nga agpateg iti P30,000, ken selponna a Galaxy nga agbalor iti P10,000.00.

Segun iti biktima, pinana wanna a nakaserra ti kuartona idi agarup 11:00 ti Nobiembre 3 ket nagturong iti Lyric Cinema ket naggiinomda kadagiti gagayyemna ket nadiskubrena ti panagtakaw idi naggawid ti agarup 5:00 ti agsapa ti No-biembre 4.#