3 paltog, balbala nakumpiska dagiti polis kadagiti sinukisokda a balay

BANTAY, Ilocos Sur – Naggigiddan a sinukisok dagiti nagtitipon a grupo dagiti polis ti pagtaengan dagiti lima nga agnaed iti Barangay Tay-ac ditoy nga ili idi agsapa ti Nobiembre 19 a nakakumpiskaanda kadagiti paltog ken balbala.

Nasukisok ti balay da Darwin Herrera, Rodel Herrera, Renato Herrera, Sr., Fernando Herrera, Jr. ken Fernando Herrera, Sr. babaen ti nagtipon nga elemento ti PIB Ilocos Sur PPO ken ti ISPPSC babaen ti panangidaulo ni PCI Christopher Catalino Rebujio babaen ti search warrant nga inyisio kadakuada ni Judge Francisco Ante Jr. ti MTCC,  Vigan City.

Nakakumpiska dagiti nagsukisok iti balay ni Darwin Herrera ti maysa a homemade Magnum 22 revolver marked Colt Special, 5 a bala ti Magnum 22 rimfire, 9 a kapsula ti Magnum rimfire, maysa a homemade gauge 12 shotgun rifle nga awanan iti marka ken serial number, ken 3 a bala ti gauge 12 shotgun.

Nakakumpiska pay dagiti polis iti balay ni Renato Herrera, Sr. iti maysa a homemade cal 5.56 pistol single shot wenno one pong ken maysa a bala ti cal. 5.56.

Negatibo ti resulta ti panagsukisok dagiti polis iti balay da Rodel Herrera, Fernando Herrera, Jr., ken Fernando Herrera, Sr.

Sinaksian dagiti barangay officials ti panagsukisok dagiti polis kadagiti nasao a pagtaengan.

Naipan iti ISPPSC dagiti nakumpiska a balbala ken palpaltog ken naipilaan da Darwin ken Ranato Herrera, Sr. iti kaso a panagsalungasing iti PD 1866 kas inamendaran ti RA 8294 iti provincial prosecutor.

Insayangkat dagiti operatiba dagiti nasao a panagsukisok iti sanguanan dagiti nagsasaruno a pammapatay a naisayangkat iti probinsia.#