3 pammaltog naisayangkat, 2 nagudas

BANTAY, Ilocos Sur – Di pay napudotan iti puestona ti OIC PNP provincial director, tallo a pammaltog ti naisayangkat iti tallo nga ili a nakatayan ti dua.

Naireport a dua a pammaltog ti naisayangkat iti Vigan City, idi Disiembre 2 ken 5 ken iti Sta. Cruz idi Disiembre 4.

Naideklara a dead on the spot ni Wilmer Aganon y Anicas, 34, baro, awanan panggedan, ken residente iti Sitio Caguitaraan, Barangay San Julian Norte, Vigan City, kalpasan a pinaltogan ni Joel Aganon y Fallet, 40, naasawaan, kasinsin ti biktima idi agarup alas 9:00 ti bigat ti Disiembre 2.

Kas maibatay iti police blotter, adda ti biktima iti terasa ti balayna idi mapapati a pinaltogan ti suspek.

Narekobre dagiti inbestigador ti maysa a Gauge 12 shotgun a mapapati a naaramat iti pammaltog iti follow-up operation nga insayangkatda kalpasan a nakaawatda iti tip manipud ken ni Harvey Aganon y Anicas, 31, kabsat ti biktima.

Naipanen ti nasao a paltog iti Crime Lab, Ilocos Sur PPO para iti ballistic examination.

Saan a naidanon a sibibiag iti ospital ti sabali pay a biktima ti pammaltog gapu kadagiti sugatna iti rupa ken bukotna.

Nabigbig ti biktima a maysa nga Arsenio Javinar, Jr. y Asuit, 32, naasawaan, agparparti, ken residente iti Barangay Nagtenga, Sta. Cruz, Ilocos Sur.

Segun iti report, maysa a Joman Basallo y Javien, taga-Barangay Sevilla, Sta. Cruz ti nangireport iti polis a nakitana ti bikima a nakadalutaytay iti abay ti motorsiklona iti national highway a sakup ti Barangay Bayugao, Este ti nasao met laeng nga ili.

Nakarekobre dagiti inbestigador iti kapsula manipud iti Cal 9mm iti uneg ti maysa a waiting shed iti makannawan nga abaga ti kalsada.

Di pay ammo ti motibo ken kinaasino dagiti nangisayangkat iti pammapatay.

Kabayatanna, ti kayong ti complainant ti mapapati a nanggandat iti biag daytoy iti pammaltog a napasamak idi agarup alas 6:00 ti agsapa ti Disiembre 5 iti Barangay VI, Vigan City.

Iti pannakaisurat daytoy, madaman a maisagsagana a maipila ti kaso maikontra ken ni Edmun Artates, 29, naasawaan, ken kabbalay ti complainant a ni Gary Zaldy Baquiran y Partosan, 33, baro, welder, ken residente iti Barangay VI, Vigan City.

Iti inisial nga inbestigasion dagiti polis, madama nga agkapkape ni Baquiran iti nipa hut idi kellaat a nagparang ni Artates sana pinalikudan a pinaltogan ti kayongna ngem nagmintis.

Kinamat ni Artates ti kayongna ngem saannan a nakamatan.

Mapapati a cal 45 a homemade paltik ti naaramat iti pammaltog.#