3 pammaltog, naisayangkat iti uneg ti makalawas

BANTAY, Ilocos Sur – Tallo a nagsasaruno a pammaltog a naisayangkat iti las-ud ti makalawas ditoy nga ili ken San Juan, Ilocos Sur.

Napaltogan ni Erwin Acedo y Robiego, residente iti Barangay Sabang, Cabugao, Ilocos Sur iti bus terminal iti tiendaan publiko ditoy idi Oktubre 15; ni Jun Urata Valledor, 22, baro, residente iti Sitio Nagulodan, Barangay Darao, San Juan, iti sardam ti Oktubre 17; ken ni Macrino Asuncion Aguilar, 43, mannalon, ti asawana a ni Angelita Marzan Aguilar, 39, ken ti anakda a ni Mary Rose Marzan Aguilar, 17, agpapada nga agnaed iti Barangay Sagnaeb, Bantay, Ilocos Sur iti Oktubre 18, 2010.

Segun iti inbestigasion dagiti polis, kadisdissaag ni Acedo iti traysikel iti terminal ti bus iti tiendaan iti Zone 6, Bantay idi inasitgan ti suspek a nagmaskara ken nakaanteohos ket pinaputokanna ti biktima.

Naglugan ti suspek iti motorsiklo a minaneho ti kaduana sada naglibas iti amianan a direksion idinto a naitaray ti biktima iti Metro Vigan Cooperative Hospital.

Nakarekobre dagiti inbestigador iti sangapulo a kapsula ken 2 a nakuppil a buli iti nakapasamakan ti krimen.

Sinapul dagiti nagresponde a polis dagiti suspek ngem negatibo ti resultana.

Iti pammaltog iti San Juan, aggawiden ti biktima a kaduana dagiti kalugaranna a da Keethleen Vita Valoroso, 23, ken Raleigh Vita Valoroso, 21, idi tallo a motorsiklo a nagluganan da Warren ken Victor Peneyra, Ryan Guerrero; maysa nga Orbon, Pilong ken Toping, agpapada nga agnaed iti Barangay Muraya, San Juan, Ilocos Sur ti immasideg kadakuada sa maysa kadagiti suspek iti nangpaltog ken ni Urata.

Naitaray ti biktima iti Metro Vigan Cooperative Hospital idinto a naglibas dagiti suspek iti laud a direksion.

Kabayatanna, iti pammaltog iti Sagneb, Bantay, Ilocos Sur, saanen a naidanon ti biag ni Macrino Asuncion Aguilar, 43, mannalon, iti Metro Vigan Cooperative Hospital, a kasapulan a naopera ti asawana a ni Angela gapu iti sugatna iti duri iti nasao met laeng nga ospital, idinto a nagsagrap ni Mary Rose iti sugat iti pingping a nagtaud iti Gauge 12 Buckshot kas maibatay iti kapsula iti crime scene. Segun iti inbestigasion, kasangsangpet dagiti biktima iti balayda idi pinaltogan ni Arcadin Laurente y Madriaga, 56, mannalon, residente iti Barangay Cabusligan ni Macrino sana insaruno ni Mary Rose.

Dati a susik ti mapapati a puon ti pammaltog.#

Enhanced by Zemanta