3 panagtakaw nagsasaruno naisayangkat iti maymaysa a rabii

STA. CRUZ, Ilocos Sur -Maymaysa a grupo dagiti nagisayangkat kadagiti panagtakawĀ  iti tallo a barangay ditoy nga ili idi rabii ti Hunio 13?

Rimmuar daytoy kalpasan a naireport a nasukainan dagiti inbestigador dagiti ramit a natakaw kadagiti biktima iti compartment ti natakaw a motorsiklo nga inabandonar dagiti mannanakaw, kasta met ti pannakasarak iti maymaysa a disso ti personal belongings ti maysa a biktima ken ti flat screen television set a natakaw iti sabali a biktima.

Segun iti report, mapapati a nakaaruat dagiti mannanakaw a nanguli dagiti tallo a pagtaengan iti yellow green jacket ken nakatsalekoda, kaarngi ti uniporme dagiti barangay tanod.

Ngem kinuna dagiti polis nga agtultuloy ti panagimbestigada mainaig kadagiti nadakamat a panagtakaw

Maipalagip a nagsasaganad a natakawan idi rabii ti nadakamat a petsa ti pagtaengan ni Maria Lilibeth Javonitalla y Leswe, 42, residente iti Barangay Gabur Norte; Violeta Javonillo y Javinar, 57, residente iti Barangay Mambog; ken Denie Sarmiento y Corpuz, 39, residente iti Barangay Dili.

Natakaw iti balay ni Javonitalla ti Cherry mobile cellphone ken MyPhone, KMC flatĀ  screen TV, TV/Cable converter, bag ken P2,450.00.

Nasukalan ni Maria Leah Javonitalla, 19, ti panagtakaw iti balayda idi nakariing iti agarup 1:40 iti dayta a petsa ket nakitana a nakalukat ti tawa ti kuartona ken agkaraiwara dagiti gargaretna.

Segun iti panagimbestiga dagiti polis, simrek dagiti mannanakaw iti balay ti biktima babaen ti kawayan a tawa idinto a nagnada kalpasan ti panagtakaw iti ruangan a naaramid met la iti kawayan.

Intaray pay dagiti mannanakaw iti dayta met la a rabii ti Rusi 100 motorcyle a kukua ni Noli Javonitalla y Sanchez, 42, security guard, ken residente iti Barangay Gabur Norte.

Iti Barangay Mambog, kinurimes dagiti di nabigbig a mannanakaw iti balay ni Violeta Javonillo, maysa a head teacher, ti maysa a Guess watch, Fossil watch, shoulder bag a naglaon kadagiti assorted items, Nike jacket, maysa a bag a naglaon iti wallet a naggianan dagiti ID ken ATM ni Juliet Javonillo ken 2 a cellular phones.

Simrek ken rimmuar dagiti mannanakaw iti balay ti head teacher babaen ti akinlikud a ridaw a saan a napadlakan.

Sadiay Barangay Dili,Ā  natakaw iti balay ni Denie Sarmiento y Corpuz, 39, ti maysa a Global Positioning System (GPS), Nokia cellular phone, ken P500.00.

Inikkat dagiti di nabigbig a mannanakaw ti jalousie ti tawaĀ  ket ditoy ti simrekanda iti balay.

Nupay kasta iti parbangon ti nadakamat a petsa, intawag ti sekretario ti Barangay Dili iti police station nga adda nasarakanda a maysa a Rusi 100 a napudasdasan a kukua ni Javonitalla; Rusi 150 a kukua ti maysa a Felix Albalos Ayaquil, taga-Barangay Rizal, Tagudin, Ilocos Sur; ken ti motorsiklo ni Sarmiento.

Ditoy a naduktalan dagiti polis a natakawan met ti balay ni Sarmiento.

Nasukainan pay dagiti nagresponde a polis iti compartment ti Rusi 100 dagiti selpon, ken card holder dagiti nadumaduma nga ID ni Violeta Javonillo.

Iti agarup alas 7:00 ti bigat iti dayta met la a petsa, nasarakan iti Barangay Mantanas dagiti personal belongings ti head teacher , kasta met ti flat screen TV a natakaw iti balay da Maria Lilibeth Javonitalla.

Kabayatanna, nasarakan met laeng ti Euro 150, Daan Hari a motorsiklo ni Rionero Josie Uplos, residente iti Barangay Villa Garcia, ditoy met laeng nga ili a naabandonar iti Sitio Abkir, Barangay Lacong, Tagudin, Ilocos Sur idi agarup 5:43 ti malem ti Hunio 14.

Naireport iti polis a napukaw ti nasao a lugan bayat a nakaparking iti paraangan ti balay ni Uplos idi rabii ti Hunio 13.

Nariingan laengen ni Uplos nga awanen ti motorsiklona iti nakaiparkinganna isu nga inreportna iti polis.

Adda dimmanon nga impormasion iti polis a dua a lalaki ti nakita a nakasakay iti motorsiklo ket nagturongda iti saan nga ammo a direksion.

Naiyawat ti motorsiklo ken ni Uplos kalpasan a nabigbigna ti luganna.#