3 stalls iti Kannawidan ground natakawan

BANTAY, Ilocos Sur – Tallo a negosiante ti nagbalin a biktima iti panagtakaw a mapapati a naiwayat idi parbangon ti Pebrero 4 iti mismo a puestoda sadiay Quirino Stadium a nakarambakan ti Kannawidan Ylocos Festival.

Iti report manipud iti Bantay police station, nabigbig dagiti biktima a da Shiela Costales y Bonifacio, 32, naasawaan, residente iti Villa Rosenda, Talugtug, Nueva Ecija, exhibitor ti Alshie’s Bayong and Native Craft; Marveliza Salvador y Marbil, 44, naasawaan, residente iti Lukbuban, Salcedo, Ilocos Sur, exhibitor iti Minyang Food Products; ken Maria Verenalyn Atendido y Dacquel, 26, exhibitor iti Rema’s Food Products.

Kas paset ti selebrasion ti Kannawidan Ylocos Festival, nangipasdek dagiti nadumaduma nga ili kasta met dagiti pasdek-negosio iti booth/stalls iti Quirino Stadium a nakaidispleyan dagiti tagilako a produktoda.

Iti pannakaisurat daytoy, di pay nabigbig dagiti suspek a simrek iti puesto dagiti biktima ken nangkurimes iti bagda a naglaon iti kuarta, card, alahas ken selpon.

Iti panagimbestiga dagiti polis, idi agarup 4:00 ti agsapa ti nadakamat a petsa, kalpasan a bimmangon ni Costales, napan nagdigos ket imbatina ti bagna iti uneg ti puestoda.

Idi nagsubli ni Costales, naduktalanna laengen a naiwara ti bagna iti lauden a paset ti puestona ket awanen ti kuentas ken pulserasna nga agbalor iti P20,000.00; ATM card iti LandBank; LG Tablet nga agpateg iti P7,000.00, Nokia a selpon; ken kuartana nga agdagup iti P7,000.00.

Naduktalan met dagiti dua a sabali pay a biktima nga awanen dagiti bagda idi makariingda iti agarup 6:00 iti dayta met laeng nga agsapa.

Segun ken ni Salvador, natakaw ti bagna a naglaon iti selponna a Cherry Mobile; alahas, P340.00 a cash ken 1 US dollar. Natakaw met ti bag ni Atendido a naglaon iti dua a selpon a Samsung S Duos ken Nokia, ken ATM card.

Nasarakan dagiti inbestigador dagiti bag da Salvador ken Atendido iti abagatanen a paset ti Quirino Stadium ngem awanen dagiti linaonda.

Rinambakan ti gobierno probinsial ti Kannawidan Ylocos Festival a nangrugi idi Enero 29 ken nagpatingga idi Pebrero 8, kas paset iti panangselebrarna iti panagwaywayas ti Ilocos Sur a kas probinsia idi Pebrero 2, 1818 ken kas panangitandudo ti gobierno probinsial iti turismo ken panangipromotna kadagiti produkto dagiti nadumaduma nga ili ken siudad iti probinsia.#