SARRAT, Ilocos Norte – Ibilangen ti polis a nasolbaren ti pannakapapatay ti barangay captain ti Barangay 2 ditoy nga ili kalpasan ti pannakaaresto dagiti tallo a suspek iti pammapatay.
Addan iti kustodia ti polis ditoy dagiti suspek a da Lordelito Torda, Richard Borjal ken Riccel Sison, agpapada a pasurot ni Mayor Edito Balintona ditoy nga ili.
Napapatay ni Barangay Captain Francis CariƱo idi agarup alas 8:50 ti rabii ti Oktubre 19 bayat ti panagiinomda kadagiti sumagmamano a kakaduana iti balay ti maysa a gayyemda iti nadakamat a barangay.
Naitaray ti barangay captain iti Gov. Roque Ablan, Sr. Memorial Hospital ngem naideklara nga awanen ti biagna idi maidanon iti balay-pagagasan.
Nakarekobre dagiti polis iti uppat a basyo manipud iti cal.45 ken uppat a buli iti nakapasamakan ti krimen.
Maysa kadagiti kainuman ti barangay captain ti nakailasin ken ni Sison kasta met iti inaramat dagitoy nga Izusu a lugan a kukua ni Balintona. Addan itiĀ kustodia dagiti polis ti nasao a sasakayan.
Iti pursuit operation nga insayangkat dagiti polis, naaresto ni Sison iti balayna iti Barangay 7 ditoy met laeng nga ili iti agarup alas 10 iti dayta met laeng a rabii.
Simmuko ni Borjal iti polis idi alas 11:20 idiay Sinait, Ilocos idinto a naaresto ni Torda iti San Vicente, Ilocos Sur idi agarup ala 1:30 iti malem ti Oktubre 21.
Ni Torda ti maitudtudo a pimmaltog ken ni CariƱo.
Kabayatanna, maysa nga anggulo a kitkitaen ti Special Investigation Task Group (SITG) āCariƱoā a binukel ni Ilocos Norte provincial director Senior Supt. Marlou C. Chan no adda pakainaigan iti politika ti pannakapapatay ti barangay captain.
Kinuna pay ni Chan nga ikonkonsiderada a maikabil iti watch list ti Barangay 2 iti masungad a barangay ken SK elections inton Oktubre 25.#
