3 suspek pannakapapatay Salincub barangay captain, nakasuan iti murder

SANTIAGO, Ilocos Sur – Tallo a tattao a pakairamanan ti maysa a barangay captain ti nakasuan mainaig iti pannakapapatay ti barangay captain ti SalincubĀ  idi Disiembre 4.

Nakasuan iti murder mainaig iti pannakapapatay ni Salincub Barangay CaptainĀ  Antonio Valdez y Laranang, 55, naasawaan, retired PNP member, da Eduardo Dela Cruz y Tolentino, Arsenio Dela Cruz y Tolentino, agpada a residente ti Barangay Dirdirig, Burgos, Ilocos Sur ken Barangay Captain Mario Corpuz y Escritor, residente iti Barangay Al-aludig, Santiago, Ilocos Sur ket naipila daytoy iti opisina ti provincial prosecutor, Vigan City.

Dead on arrival ni Valdez iti CandonĀ  General HospitalĀ  gapu iti grabe a sugatna iti tengngedna kalpasan a pinaltogan iti dua a lalaki a nakalugan iti motorsiklo iti national highway a sakup ti Barangay Dan-ar ditoy nga ili idi agsapa ti Disiembre 4.

Nagsagrap met iti sugat iti ulo ken bagina ti insakay ni Valdez a nainaganan Bryan Ellorin y Ellorin, 29, naasawaan, ken residente met laeng iti nadakamat a barangay.

Kitkitaen dagiti inbestigador no adda pakainaiganna iti kalkalpas a barangay election a naangay idi Oktubre 28 daytoy a tawen wenno iti kinapolis idi ti biktima.

Iti inisial a panagimbestiga dagiti polis, agdaldaliasat nga agpaamianan ti Honda Wave a minaneho ni Valdez ket idi makadanonda iti nakapasamakan ti krimen, kellaat nga immabay ti sumarsaruno kadakuada a motorsiklo a nagluganan dagiti suspek ket pinaltogan ti back rider ti biktima a nakatamaan ti makannigid a tengnged ti barangay captain.

Gapu iti pannakapaltog ni Valdez, naidungpar ti motorsiklona iti sementado a bangen iti akindaya nga abaga ti kalsada.

Nakarekobre dagiti inbestigador manipud iti SOCO team a naggapu iti Candon City Crime Laboratory iti maysa a kapsula a mapapati a nagtaud iti cal. 45 pistol iti nakapasamakan ti krimen.

Imbilin niĀ  Gov. Ryan Singson ken ni Senior Supt. Jemar Delgado Modequillo, provincial director, a mangiwayat iti naun-uneg nga inbestigasion mainaig iti pannakapapatay ni Valdez y Laranang tapno maammuan no ania ti pudno a napasamak.

Nangitanggaya met ni Mayor Boy Miranda iti P100,000.00 a gunggona para iti asinoman a makaited iti impormasion para iti pannakasolbar ti nasao a pammapatay ken pannakatiliw dagiti nangisayangkat iti krimen.#