3 taga-Ilocos Sur; 5 taga-Ilocos Norte top 10 iti LET

VIGAN CITY – Tallo a taga-Ilocos Sur, idinto a 5 met iti Ilocos Norte ti karaman iti Top 10 iti Licensure Examinatioin for Teachers (LET) a naangay idi Septiembre 25., 2016.

Kas maibatay iti resulta ti eksamen nga inruar ti Professional Regulations Commissions (PRC) ken ti Board for Professional Teachers (BPT), karaman iti top ten iti LET, elementary level, da Shaira Ritz Timbang Asuncion ti Ilocos Sur Polytechnic College, Tagudin, Ilocos Sur ken ni Loyd Angelo Makiramdam Diana ti North Luzon Philippines State College, Candon; idinto a nairaman iti top ten iti secondary level ni Darigold Perinion Apopo ti University of Northern Philippines, Vigan City.

Nagun-od ni Shaira Ritz ti maikapito a ranking babaen ti ratingna a 86.80% ken maika-10 a ranking met ni Loyd Angelo babaen ti ratingna a 86.20%.

Maika-10 met ti ranggo ni Darigold babaen ti ratingna nga 88.00%.

Kabayatanna, lima a nageksamen iti LET iti Ilocos Norte ti limsot iti top ten, elementary level iti nasao met laeng nga eksamen.

Maikapito ti ranking ni Clarissa Paligutan Pascual ti Mariano Marcos State University, Laoag-College of Education babaen iti ratingna nga 86.80%; agpada a No. 8 da Shiena Mae Tagatac Acierda ti Mariano Marcos State University, Laoag-College of Education (86.60%) ken Ralph Christian Visaya ti Mariano Marcos State University, Currimao-College of Education (86.60%); ken agpada a No. 10 da Heidiebel Cabbat Balais, Mariano Marcos State University, Laoag-College of Education (86.20%) ken ni Darie Mae Alejo Mateo, Mariano Marcos State University, Laoag-College of Education (86.20%).

Nagun-od pay ti MMSU ti No. 6 ranking kadagiti top 10 performing schools iti sapasap a pagilian ta iti 228 a kadagupan a nageksamen iti LET manipud iti MMSU, 200 kadagitoy ti pimmasa.

Iti kadagupan a 77,466 a nageksamen, 23,378 elementary teachers dagiti nakapasa wenno 30.18% ken 31,334 secondary teachers ti nakapasa iti kadagupan a 92,754 examinees wenno 33.78%.

Naangay ti LET iti 25 testing centers iti sapasap a pagilian a pakairamanan ti Manila, amin a regional offices (Baguio, Cagayan de Oro, Cebu, Davao, Iloilo, Palawan, Legazpi, Lucena, Pagadian, Tacloban); Zamboanga, Bacolod, Antique, Rosales, Pangasinan ken Laoag ken iti Hong Kong.

Segun iti PRC, kadagiti nakapasa iti elementary level, 21,896 ti damona ti nageksamen idinto a 1,482 dagiti repeaters. Iti met secondary level, 28,957 ti nakapasa a first timers idinto a 2,377 laeng dagiti repeaters. (Tawid News Team)