3-tawenna nga ubing, dinungpar ti kotse, natay

BANAYOYO, Ilocos Sur – Kinaliway ti gapu ti nakatayan ken nakayospitalan ti dua nga ubbing nga agtawen laeng iti uppatĀ  ken tallo iti nagsina nga aksidente a napasamak iti Sta. Maria, Ilocos Sur ken ditoy nga ili iti las-ud ti dua nga aldaw.

Natay ni Jovani Ramirez y Coloma, 4,Ā  agnaed iti Barangay Suso, Sta. Maria iti Guerrero Memorial Hospital a nakaitarayanna, idinto a nagsagrap kadagiti grabe a ulo ken makannawan a patongna a puon ti nakayospitalanna ni Chris Lawrence Raguton y Lopez, 3, agnaed iti Barangay Poblacion ditoy nga ili.

Segun iti report, mapapati a nagay-ayam ni Ramirez iti igid ti kalsada ti Barangay Suso, Sta. Maria iti agarup alas dies treinta iti Abril 13 sa kellaat a bimmallasiw ket mapapati a saan a napakadaan ni Manolito Escobar y Obrero, 48, naasawaan, inhiniero, ken residente iti 5 Zamora St., Zone 5, Bangued, Abra a nagmaneho iti Nissan Sentra ket nadungparna ti biktima a nakadunoran ti ulo daytoy.

Pimmusay ti ubing bayat ti pannakatamingna iti ospital.

Saan a nailanad iti blotter nga adda kadua ti ubing a nagay-ayam iti igid ti kalsada.

Kabayatanna, naammuan a kakuyog ni Ragunton ti lolona idi mapasamak ti aksidente iti national highway a sakup ti Barangay Poblacion ditoy nga ili idi malem ti Abril 11.

Naammuan iti inbestigasion a dimsaag dagiti aglolo ket imbati ti lakay ti ubing iti abay ti passenger jeep sa bimmallasiw iti kalsada tapno umisbo.

Simmurot ti ubing a bimmallasiw ngem simmungad met ti motorsiklo a minaneho ni Geoffrey Orpilla y Gaoat, 35, naasawaan, mannalon, ken residente iti Barangay Tablac, Candon City ket nadungpar ti ubing a nakadunoran ti ulona ken makannawan a patongna.

Agpada a naitaray da Orpilla ken ti ubing iti Candon General Hospital ngem naiyalis ni naud-udi iti Ilocos Regional Center iti San Fernando City gapu ta grabe dagiti sugatna.#