3 ubbing, nairaman a nauram

SANTIAGO, Ilocos Sur. Tallo nga ubbing ti natay iti napasamak nga uram iti Barangay Poblacion Sur ditoy nga ili itay nabiit.

Nairaman a nauram da Adrian Corpuz, 4, Andrea, 3, ken Aldrin Jr., 1, gapu ta napupokda idi mauram ti pagtaenganda.

Segun iti blotter, mapapati nga impupok dagiti agassawa nga Aldrin Corpuz ken ni baketna dagiti annakda iti kuartoda ket napanda nakisugal.

Mapapati nga adda inay-ayam dagiti tallo a pusporo a puon ti nakauraman ti balay.

Naitaray dagiti agkakabsat iti ospital ngem pimmusayda gapu iti nakaro a pannakauramda.#