3 ubbing, naiyagus iti baybay

CABUGAO, Ilocos Sur – Agdama a matamtaming iti ospital dagiti tallo nga ubbing a naiyagus iti baybay bayat ti panagdidigosda iti kabaybayan ti Barangay Pug-os ditoy nga ili idi aldaw ti Disiembre 25.

Iti pannakaisurat daytoy, naiyospital da Johanna Gandil y Lopez, 4, Day Care pupil; Janelle Gandil y Lopez, 8, Grade III; ken Jeanne Marie Gandil y Medina, 8, Grade II, agpapadada amin a residente iti Barangay Baclig, Cabugao, Ilocos Sur.

Segun iti report, napan nagdidigos iti kabaybayan ti nadakamat a barangay dagiti tallo nga ubbing, kaduada ti ulitegda a ni Erick Ferrer y Espinosa, 22, baro, ket naiyagusda iti dalluyon.

Nupay kasta, naalaw ni Ferrer dagiti ubbing ket naitarayda iti Suero General Hospital.

Mapapati a ni Johanna ti kakaruan ket naiyalis iti Gabriela Silang General Hospital.#