30 nga estudiante iti Ilocos Sur, baro nga YSLEP Caritas college scholars

VIGAN CITY – Agdagup iti 30 nga agtutubo iti Ilocos Sur dagiti benepisario ti Youth Servant Leadership Educational Program (YSLEP) a mangipapaay iti college scholarship grants kas panangsuporta ti Arkidiosesis ti Nueva Segovia kadakuada iti panagadalda tapno inton makaturposda iti kolehio ket maaddaanda iti nasaysayaat a panagbiag.

Dayta ti naammuan iti Office of the Social Action Commission – Caritas Nueva Segovia. Naammuan a kalpasan ti orientation ken interview kadagiti agtutubo nga agtarigagay nga agbalin nga scholars, ken kadagiti nagannak kadakuada ket napirmaanen ti Memorandum of Agreement para ti panagbalinda a benepisario ti YSLEP college scholarship grants a mangrugi ita nga School Year 2019–2020.

Mainayon kadagiti kabarbaro a 30 a benepisario ti YSLEP college scholarship grants ket adda pay agdama nga uppat nga scholars nga iti panaglukat ti klase ti kolehio ket umaddangdanton iti maikadua a tawen. Iti daytoy a panagserra ti klase ti kolehio ket lima met dagiti nagturpos iti nagduduma a kurso. Idi 2018 ket agdagup iti 17 dagiti nagturpos a kameng ti umuna a batch dagiti Caritas college scholars.

Ti YSLEP college scholarship grants ket esponsoran ti Caritas Manila ken iyim-implementar ti Caritas Nueva Segovia iti Ilocos Sur para kadagiti agtutubo a nagtaud kadagiti napanglaw a pamilia kas wagas a
panangiparikna ti Simbaan iti ayat ti Dios kadagiti agtutubo nga aggapu kadagiti marigrigat a kaamaan.

Iti pannakiuman kadagiti sumagmamano a benepisario ti YSLEP college scholarship grants, sangsangkamaysada a nangipeksa ti panagyamanda iti Dios ken ti Simbaan iti tulong a maawatda iti panagadalda. Inkarida a saanda a sayangen ti tulong ken gundaway nga ipaay ti Caritas kadakuada ket ipasnekda ti agadal agingga iti makaturposda iti kolehio tapno maaddaandanto iti nasaysayaat a biag ken pagsapulan ken makatulongdanto met iti pamilia ken padada a tao.

Impalgak met dagiti nakauman a nagannak ti napalaus a panagyamanda iti Dios, Simbaan ken Caritas iti panagbalin a benepisario dagiti annnakda ta naindaklan a pakalag-ananda iti panagpabasada kadagiti ubbingda nangruna ita a karigat ti panagbiag.

Impalgakda nga uray no libren ti matrikula iti kolehio kadagiti state colleges and universities, ken adun dagiti nagduduma nga scholarship grants ngem dakkel a tulong kadakuada ti YSLEP college scholarship grants ta mismo a dagiti agpapaay iti Simbaan ti nangiyasideg kadakuada ken dakkel a tulong ti financial support kadakuada manipud iti YSLEP nangruna kadagiti kasapulan dagiti estudiante.

Naamuan ken ni Ms. Gemmalyn Alvarez, YSLEP coordinator, ti nasayaat a bunga ti programa ta adun kadagiti nagturpos a benepisario ti YSLEP college scholarship grants ti addaanen iti nasayaat a pagsapulan a tumultulong met laeng kadagiti pamiliada. Impalgakna a dagiti nagturposen a sigud nga scholars, ken agdama nga scholars nga agreduarto iti masakbayan ket saanda koma a liplipatan ti ayat ken grasia ti Dios nga inusarna ti Caritas a mangtulong kadakuada, ket isublida koma dayta nga ayat babaen ti panangtulongda met kadagiti agkasapulan.

Impakaamo pay ni Ms. Alvarez a nangrugi ti YSLEP iti Nueva Segovia idi 2014 ket adun dagiti napagturpos ti programa. Naammuan pay ti kaaddan dagiti sigud nga YSLEP scholars a nagbalinen a licensed teachers a mangisursuro iti eskuela Katolika ken minor seminary a mangipakita ti kinapudno dagitoy a sigud nga scholars kas servant leaders.

Ti YSLEP ket maysa laeng kadagiti programa nga iwaywayat ti SAC – CNS a pangtulong kadagiti napanglaw tapno maiparikna ti ayat ken asi ti Dios kadagiti napanglaw. Mairaman pay ti masansan a pannakaisayangkat dagiti charity health missions kadagiti nagduduma a parokia ti Nueva Segovia ken dadduma pay a programa ti pannakasaluad ti salun-at. Maisaysayangkat dagitoy a programa iti panangilungalong ni Arsobispo Marlo M. Peralta tapno matulongan dagiti napanglaw iti Nueva Segovia.