30 nagturpos iti panagparti

VIGAN CITY – Tallupulo nga estudiante ti nagturpos iti panagparti iti babaen ti Eskuela de los Mataderos ditoy iti simple a programa a naangay iti Vigan Culture and Trade Center idi Abril 15 ditoy.

Segun ken ni Desiderio Martinez, program director ti nasao a pagadalan, dagiti 30 nga estudiante dagiti umuna a napagturposda iti daytoy a tawen.

Kinuna ni Martinez a nasuroken a 170 ti napagturpos ti Eskuela de los Mataderos manipud 2007.

Impalgakna a 32 kadagiti nagturpos ti agtrabtrabahon iti sabali a pagilian: 5 iti New Zealand, 7 iti Australia ken kaaduanna iti Canada.

Kinunana pay a dagiti dadduma a nagturpos, addan panggedanda idinto nga ur-urayen dagiti dadduma ti kontrata ken bisada ken pannakainterbioda para iti panagtrabahoda iti abroad.

Programa ti city government nga idauluan ni Mayor Eva Marie S. Medina ti Eskuela de los Mataderos a kangrunaan a panggepna ti pannakayadal ti panagparti iti animal a pakateggedan ken pagsapulan dagiti agturpos.#