300 nagrali kontra pork barrel scam sadiay Baguio

SIUDAD TI BAGUIO –  Tallo gasut a ralista a naggapu kadagiti nadumaduma a sektor ti kagimongan nga indauluan ti maysa a militante a grupo ti nagdudupudop iti People’s Park, Burnham Park ditoy siudad idi Lunes ket  nakipagmaymaysada a nangiyebkas iti panangkondenarda iti pork barrel kas pannakikammmayetda kadagiti nadumaduma nga probinsia ken siudad iti intero a pagilian a nangisayangkat iti panagprotesta a naawagan iti One Million People’s March Against Pork Barrel.

Indauluan ni nalatak nga international filmmaker Kidlat Tahimik dagiti padana nga artista a nangipuesto a pasirkulo dagiti nadumaduma a “bulul” (rice granary guardian) nga addaan imahe ti tao a nakaawit iti baboy.

“Ireserbatayon daydiay baboy para iti cañao,” kinuna ni Tahimik.

Paset ti kultura ti Cordillera ti tradision ti cañao a pakapartian ti nangisit a baboy ket amirisen  dagiti mambunong wenno panglakayen a mangngagas ti dalemna no nasayaat wenno dakes ti ipalnaadna.

Karaman dagiti nakipartisipar iti rali dagiti dadduma pay a grupo a pakaibilangan ti SELDA, COURAGE, Gabriela-Innabuyog, Anak Bayan, Bayan Muna, dagiti estudiante manipud kadagiti nadumaduma nga eskuelaan iti siudad a paka-iramanan ti UP Baguio, mang-mangged, mannalon, prope-sional ken dadduma pay a sektor a pakairamanan dagiti naduma-duma a sekta ti pammati.

Iti panagbitla ni Wendil Bolinget, Chairman ti Cordillera Peoples Alliance, maysa a militante a grupo iti Cordillera, impalnaadna a “kasapulan ti binnayagan a pannakidangadang iti daytoy nga isyo ken iti naan-anay a panagkaykaysa dagiti umili.”

Imbatad met ni Able Alongos, secretary general ti CPA nga opisial a pagtaktakderan ti grupoda a “mapasardeng koman amin a sistema ti pork barrel iti man congressional, presidential ken karamanen dagiti dis-cretionary funds.”

Kinuna dagiti opisial ti CPA a billion a pesos ti napukawen a naipan kadagiti al-alia a proyekto, killo a politiko, karamanen dagiti mapagdu-duaan ken peke nga NGOs, a nakaidagelan dagiti umili ken nakabaybay-an dagiti sumagmamano a sektor kas kadagiti indehenioso nga umili.

“Kayatmi a  maibaw-ing koma dagiti pondo para iti sosial ken pampubliko a serbisio kas iti salun-at, edukasion ken pabalay,” kinuna ni Alongos.

“Rumbeng a suportaran daytoy nga isusupiat agsipud ta maysa daytoy a nainkalintegan ken nainhustisiaan nga isyo a pakaseknan dagiti amin nga umili,” nakunana.

“There should be a leadership by example and I agree with President Aquino calling for the abolition of the pork barrel,” kinuna met ni OWWA Cordillera Regional Director Manuela Nuval-Peña a timmabuno iti nasao a martsa.#