3,250 ageksamen iti Nurses Licensure Examination

BAGUIO CITY – Agdagup iti tallo ribu dua gasut ket limapulo dagiti ageksamen iti Nurses Licensure Examination inton Mayo 30 ken 31, daytoy ti inrakurak ti Professional Regulation Commission (PRC), Baguio Regional Office itay nabiit.

Agdagup iti 1,680 dagiti ageksamen kadagiti test centers iti Baguio City a pakaibilangan ti Baguio Central School, Colegio Nacional, Inc., Josefa Cariño Elementary School, Lucban Elementary School, Teachers Camp – NEAP, ken Teachers Camp – Quezon Hall; 747 iti Dagupan City (University of Pangasinan); 480 iti Cabanatuan City (The Good Samaritan Colleges) ken 343 iti Laoag City (Mariano Marcos State University), segun iti waragawag manipud iti opisina ni Baguio Regional Office Director Teofilo Gaius M. Sison, Jr.

Kanaig daytoy, nagyaman ti BRO iti Laoag City Government babaen ken ni Mayor Chevylle V. Fariñas, Philippine Nurses Association Regional Council of CAR, PNA Pangasinan, PNA Nueva Ecija Chapter, PNA Ilocos Norte Chapter, Philippine National Police, National Bureau of Investigation, Department of Education, ken nadumaduma nga unibersidad ken kolehio gapu iti suportada ken kooperasion.#