33 a sako nga irik, natakaw iti bodega

CANDON CITY – Sinaksako nga irik ti nailibas a nabagkat manipud iti maysa a bodega ti maysa a negosiante a mapattapatta a naisayangkat idi rabii ti Nobiembre 28.

Nabigbig ti suspek a maysa a Jefrey Gacoscos, a.k.a. “Sadam”, 24, baro, mannalon ken residente iti Barangay Ayudante, ditoy siudad.
Segun iti report, naduktalan ni Ronaldo Gadia Cula, 40, naasawaan, mannalon, ken residente iti Barangay Luba, Sta. Lucia, Ilocos Sur a mapukpukaw ti 33 a sako ti irik iti bodega ti kabsatna a ni Maria Theresa Cula a masarakan sadiay Barangay Ayudante idi bigat ti Nobiembre 30 ket nasarakan ti maysa a sako ti mapukpukaw nga irik iti Material Recovery Facility iti Barangay Calaoa-an, Candon City.

Natuntonan dagiti otoridad ti naglako iti irik a maysa a Jaypee Ramos, 31, naasawaan, tricycle driver, ken residente iti Barangay Calaoa-an, Candon City ket inannugot daytoy a binaon ni Gacoscos a naglako kadagiti irik.

Kinuna ni Ramos a sumagmamanon a daras a naglako iti irik.

Naammuan ti kapolisan a naireporten a nainbolbar ni Gacoscos iti panagtakaw iti kallabes.

Kabayatanna, nagpulong ti maysa a negosiante a natakawan ti tiendana a masarakan iti Barangay Baliw Daya, Santa Maria a masuspetsa a naisayangkat iti karabian ti panagtapos ti bulan ti Nobiembre.

Inreport ni Jose Romero y Anastacio, 69, negosiante, akinkukua iti RCJ Livestock and Poultry Supply ken residente iti Barangay Poblacion Norte, Sta. Maria a natakaw iti tiendana ti lima a saggugudua sako a bagas nga agbalor iti P4,750.00, 10 rims a Marlboro cigarettes nga aggatad iti P3,800.00 ken assorted coins nga agdagup iti aganay P10,000.00.

Iti panagimbestiga dagiti polis, nakastrek dagiti di nabigbig a mannanakaw babaen ti panangdadaelda iti kongkreto a diding iti likud ti tienda.

Naserrek met ti kabangibang a bodega a nakaikabilan dagiti feed products ken kinaban a bagas a kukua ni Marilou Cabutotan ti Barangay Baliw Laud, Sta. Maria, Ilocos Sur ngem kalpasan ti inbentoria, awan met ti napukaw.

Mapapati a maymaysa a grupo ti nangisayangkat iti panagtakaw.

Mapattapatta a naisayangkat ti panagtakaw iti RCJ Livestock and Poultry Supply a masarakan iti Barangay Baliw Daya, Sta. Maria, Ilocos Sur iti nagbaetan ti rabii ti Nobiembre 30 ken agsapa ti Disiembre 1.#