Balay ti retirado a US Navy man, dimmapo

NARVACAN, Ilocos Sur –  Karaman a napugpogan ti maysa a retirado a kameng ti US Navy idi nauram ti balayna sadiay Barangay San Antonio ditoy nga ili idi parbangon ti Disiembre 19. Segun iti report, idi agarup alas 2:00 ti parbangon ti nadakamat a petsa, nakita laengen dagiti kaarrubada ni Roselily Soria y Pichay, retirado a maestra ken asawa ni Constante Soria y Molina, 91, nga agpapaarayat idinto a maur-uramen ti balayda. Mapapati a nakubong ti lakay ket nairaman a nauram iti uneg ti kuartona. Iti panagimbestiga dagiti bombero, mapapati a naggapu ti uram iti altar ti living room maigapu iti short circuit ti barut ti koriente.#