35 iskolar pinadayawan ti Konseho ti Vigan City

VIGAN CITY – Tallupulo ket lima nga iskolar daytoy siudad ti pinadayawan ti konseho ditoy gapu iti panagturposda a nangato ti gradoda iti kolehio, daytoy ti impakaammo ni Vigan City Vice Mayor Lourdes “Lulu” Baquiran.

Segun ken ni Baquiran, 29 nga iskolar ti naggraduar iti degree course idinto nga 6 iti non-degree courses.

Innayon ti bise mayor nga iti kadagupanda a nagturpos, lima kadakuada ti napadayawan a pakaibilangan ni Eric Calpito Cantilla (Magna Cum Laude, Bachelor of Science in Hotel and Restaurant Administration, University of Northern Philippines) (UNP); Elaine Ira Pisalbo; Edward Ablog Abinoja, Ilaine Raras Palo and Jerald Abarra Aragoza, (cum laude, UNP).

Naikkan iti pammadayawan dagiti nasao nga iskolar babaen ti resolusion nga inesponsoran ni Konsehal George Villanueva.

Naipaayanda iti libre a tuition fees, ken alawans, kasapulan a namentener dagiti napili nga iskolar ti Vigan City ti average grade nga 83 tunggal semestre.#