35 natay iti panangbasnot ni Bagyo Cosme iti Pangasinan, La Union, Benguet

PANGASINAN – Agdagup iti 35 a tattao ti natay iti panangbasnot ti Bagyo Cosme iti amianan a Luzon a pakairamanan ti La Union, Benguet ken daytoy a probinsia idi Mayo 23.

Kanaig daytoy, indeklara dagiti sangguniang panlalawigan ditoy a calamity area ti probinsia.

Indeklara met dagiti agtuturay ti Lingayen, Calasiao ken ti Dagupan City a calamity area ti lugarda.

Iti report manipud iti Provincial Disaster Coordinating Council (PDCC), agdagupen iti 28  a tattao ti natay ken innem a tattao dagiti nasugatan ditoy.

Iti Dagupan City, nalmes dagiti agkabsat a Randyl, 3,  ken Rodyl, 4, gapu iti pannakaiyanudda.

Natay ni Mario Quinto, residente iti Urdaneta, gapu ta napuntaan iti nagtinnag a rebba, ni Remedios Paulo, taga-Barangay Bolaoen, Bugallon gapu iti pannakarpuog ti balayna.

Iti San Carlos, natay ni Rogelio Austria idi napuntaan iti naspak a sanga ti mangga. Iti Mangaldan, nakoriente ni Carlito Maganes a puon ti nakatayanna.

Tallo nga aldaw kalpasan ti bagyo, adu pay nga ili ken siudad ditoy probinsia ti saan pay a nagsilaw gapu iti pannakadadael dagiti linia ti transmission ken pannakatuang dagiti poste.

Agdagup iti 27 a pagadalan ti nadadael ditoy, segun iti DepEd.

Lima nga aldaw kalpasan ti bagyo, saan pay nga imbaas ti danum iti Calasiao. Segun ken ni Mayor Roy Macanlalay, 14 a barangay iti ilina ti nalayus kalpasan a nagdinakkel ti Karayan Sinocalan.

Nalayus met dagiti nababa a lugar iti Sta. Barbara ken lima a barangay iti Urdaneta City.

Iti La Union, innem ti naipadamag a natay a pakairamanan ni Domingo Ubungen a napandagan iti kongkreto a diding iti ili ti Rosario, ni Juanita Iserio a napuntaan iti naiyangin a yero ken ni Pepito Estacio, agnaed iti Sto. Tomas, a nalmes kalpasan a naiyanud ti pagtaenganna iti napigsa nga agus. 

Saan pay a nabirokan ni Warlito Abat, 16, residente iti San Juan, La Union kalpasan a ginuyod ti napigsa nga agus.

Agdagup iti innem a pagadalan ti naipadamag a nadadael, segun ti DepEd iti La Union.

Maysa ti naipadamag a natay iti Benguet. Nadundunor met ti pito pay a tattao a pakairamanan ti maysa nga agtawen iti 9 nga ubing.

Kabayatanna, indeklara ti Baguio City Council nga under state of calamity ti siudad.

Segun iti National Disaster Coordinating Council, iti ilalasat ni Bagyo Cosme iti amianan a Luzon, 37 ti natay   idinto nga agpateg iti P3.5 bilion dagiti inprastruktura ken agrikultura a nadadael ken nakaapektaran iti aganay 183,000 a pamilia iti Pangasinan, La Union, Benguet ken Zambales.#