3,638 naaresto gapu iti panaglabsing iti election gun ban: PNP report

MANILA – Immabuten iti tallo ribu, innem a gasut ket tallupulo ket walo a tattao ti inaresto ti kapolisan gapu iti panaglabsingda iti election gun ban agingga iti umuna a lawas ti Hunio daytoy a tawen.

Iti report a naggapu iti PNP national headquarters, agdagupen iti 3,638 a tattao ti naaresto ken nakakumpiskada iti 3,539 nga armas manipud idi impakat ti PNP, Comelec, AFP ken dadduma pay a law enforcement agencies ti election gun ban idi Enero 13.

Impakat ti Commission on Elections ti Comelec Resolution No. 9561-A wenno nationwide “ban on bearing, carrying or transporting of firearms or other deadly weapons”ken RA 8294  wenno Codifying the laws on illegal/unlawful possession, manufacture, dealing in, acquisition or disposition of firearms, ammunition or explosives or instruments used in the manufacture of firearms, ammunition or explosives para iti pannakatagiben ti urnos ken talna iti May 13, 2013 elections.

Segun iti report, iti kadagupan a 3,638 a naaresto gapu iti panaglabsing iti Comelec Resolution No. 9561-A ken RA 8294, agdagup iti 3,353 ti sibilian ken 43 dagiti government officials ken pakaibilangan dagiti kameng ti AFP (23), PNP (51), BFP (1), BJMP (4), LEA (7), security guards (152), ken CAA (CAFGU) (4).

Kas maibatay iti report, manipud idi naipakat ti Comelec Resolution No. 9561-A agingga idi Hunio 7, agdagupen iti 3,539 dagiti nakumpiska a paltog a  pakaibilangan dagiti airgun, airsoft gun, FA replicas (162), bladed weapons (1,068), grenade (235), dadduma pay nga eksplosibo (515), ken balbala (30,335).

Segun pay iti report, addan 206 a kaskaso a naipila iti korte ken 2,234 a kaskaso a naipaima kadagiti police regional offices.

Tallo a lallaki a nainaganan Mark Kenneth Ramos y Martin, 25, baro ken residente ti Lower Quirino Hill, Baguio City; Mark Ledesma y Torres, 28, naasawaan, businessman, residente iti Bakakeng Phase 1, Ciudad Grande, Baguio City ken Mark Mondares y Bulos, 33, baro, ken resident iti Crystal Cave Turning Point, Baguio City nga inaresto ti Baguio CPSC bayat ti panagpatroliada iti nagsulian ti Crystal Cave Main Road ken Assumption Convent Road, Bakakeng, Baguio City idi Hunio 4  kalpasan a nakumpiska iti ikut ti maysa kadakuada ti maysa a paltog.

Nakumpiska iti ikut ni Ramos ti maysa a caliber .38 Armscor SPL revolver a nagkarga iti walo a bala.

Idi Hunio 5, tiniliw dagiti polis ti Balayan Police Station, Batangas ni Leonardo Bauyon y Mesina, 43, gapu iti panagpaputokna sadiay Barangay Navotas, iti nadakamat  nga ili.

Kinumpiska dagiti polis iti ikut ni Bauyon ti maysa nga improvised shotgun (sumpak) a nagkarga iti maysa a kapsula ken 5 a bala.

Idi Hunio 6, inaresto ti Iloilo City Police Station -3 ni Marvin Natonton, 22, residente iti Barangay Patlad Sapa, Dumangas, Iloilo bayat ti insayangkatda a saturation drive wenno Oplan Bakal iti Barangay Quintin Salas, Jaro, Iloilo city.

Narekobre manipud iti ikut ti suspek ti maysa a homemade shotgun (sumpak) a nagkarga iti maysa a bala.

Adda iti kustodia ti ICPS-3 ti suspek para iti maikanatad a disposision.

Agtultuloy ti panangipakat ti kapolisan ti election gun ban agingga iti panaggibusna inton Hunio 12, 2013.#