36th ISECO Annual General Membership Assembly, naangay

SANTIAGO, Ilocos Sur – Inangay ti Ilocos Sur Electric Company ti maika-36 nga Annual General Membership Assembly iti main office daytoy a kooperatiba ti elektrisidad itay Nobiembre 22.

Iti naangay a press conference a dinar-ayan dagiti kameng ti broadcast ken print media iti bigat ti nadakamat a petsa, imbinsabinsa ni ISECO General Manager Engr. Egdon Sabio dagiti inwayatda nga addang para iti naannayas nga operasion ti nasao a kooperatiba idinto a natratar pay dagiti problema a pakaseknan ti kooperatiba kas iti system loss ken dagiti addang nga ar-aramidenda iti posible a panagkamtud ti power supply inton umay a tawen.

Kinuna ni Sabio nga uray ania ti ipakat ti kooperatiba, adda latta sagrapenna a system loss iti distribusion ti koriente manipud iti planta agingga iti kabalbalayan ngem inyunay-unayna a nababbaba ti system loss ti ISECO ngem iti pukaw mainaig iti sistema nga intuding ti nasional.

No nangatngato ti system loss ti kooperatiba ngem iti nasional, ti kooperatiba ti mangibaklay a mangbayad iti sobrana.

Impalgak pay ni Sabio a napabassitda ti pukaw manipud kadagiti mataktakaw a koriente babaen ti panangikabitda kadagiti cluster meters, nangruna kadagiti lugar a bimmaba ti konsumoda iti koriente gapu iti pilferages.

Iti kamalmanna, naangay ti paripa para kadagiti nadumaduma a premio nga insagana ti ISECO para kadagiti dimmar-ay a consumer-members.#