BANNER NEWS: 392 polis naideploy kadagiti PPOs, tumulongda mangipakat SAFE 2013

CAMP BGEN OSCAR M FLORENDO— Impakaammo ti Police Regional Office 1 nga idadauluan ni Police Chief Supt. Ricardo C. Marquez, regional director, a naideployen ti 392 a police personnel kadagiti nadumaduma a provincial police offices kas paset ti kampania ti PNP a mangiyimplementar iti naseguridad ken patas nga eleksion iti daytoy a tawen.

Kinuna ni Marquez a 60 a police commissioned officers ken 332 a non-commissioned officers ti naideploy tapno supusopanda ti agdama a work force dagiti police stations iti Pangasinan, La Union, Ilocos Sur ken Ilocos Norte.

Naammuan ti Tawid News a 75 a police personnel ti naideploy iti Ilocos Norte, 72 iti Ilocos Sur, 88 iti La Union, ken 157 iti Pangasinan.

Nangrugi ti panangibaklay dagiti tropa ti pagrebbenganda iti eleksion itay Mayo 3 ket agpatingga inton Mayo 16.

Iti simple a seremonia a naangay iti PRO1 Grandstand idi Mayo 3, pinalagipan ti regional director dagiti polis iti panangitag-ayda iti kinasagrado dagiti balota ken ti panagtalinaedda a napudno kadagiti rebbengen ken responsibilidadda ken iti saanda a pannakainbolbar iti aniaman a politikal nga aktibidad.

Kinuna ni Marquez a komplimentaran dagiti nainayon a tropa dagiti police stations nga agkurkurang kadagiti personnel tapno maipakat dagiti security measures para masigurado ti pannakaisayangkat iti naseguridad ken patas nga eleksion.

Kinuna ni Marquez a naggapu dagiti augmentation troops manipud iti regional headquarters, Regional Public Safety Battalion 1 (RPSB1), Regional Training School 1 (RTS1) ken PRO1 personnel a madama nga agbasbasa iti Cordillera Administrative Region Training School (CARTS).#