4 aglaklako iti illegal a paputok, tiniliw dagiti polis

BANTAY, Ilocos Sur – Sinamsam ti kapolisan dagiti illegal a paputok a lako dagiti sumagmamano a pagtagilakuan ditoy probinsia kas paset ti nainget a kampaniada maikontra iti illegal a paputokĀ  iti panangselebrar iti baro a tawen.

Idi agarup 11:30 ti bigat ti Disiembre 28, sinamsam dagiti polis-Bantay dagiti paputok nga illegal a mailaklako iti sumagmamano nga stall sadiay Barangay Cabaroan.

Naisaklang iti panaglabsing iti RA 7138 iti provincial prosecutorā€™s office, Vigan City, Ilocos Sur dagiti stall owners a nabigbig a da Maricel Vidallo Go, residente iti Plaridel St. Vigan City; Jackson Sua ti Brgy. III, Vigan City; ken Jocelyn Patao Sunga ti Brgy. Ora West, Bantay, Ilocos Sur ken dagiti tindera dagitoy a da Irene Rapanut y Realin, 19, awanan asawa, residente iti Brgy. Calaoan, Sta. Catalina, Ilocos Sur; Charlet Ferino y Pre, 31, awanan asawa, residente iti Brgy. San Julian, Bantay, Ilocos Sur; kenĀ  Marites Farpali y Patao, 42, naasawaan, residente iti Brgy. Ora West, Bantay, Ilocos Sur.

Sadiay Magsingal, sinamsam dagiti polis ti 26 nga OG Thunder a paputok a lako ti Dhaphican Firecracker and Pyrotechnic stall a kukua ni Jesmin Pranada Terenal, 39, naasawaan ken residente iti Barangay San Lucas, Magsingal, Ilocos Sur gapu ta nasukalanda a sobra iti dagsen a pulbora dagitoy .

Naiyendorso metten iti provincial prosecutorā€™s office, Vigan City ti kaso a panaglabsing iti RA 7183 maikontra ken ni Pranada.

Sadiay Barangay Cabittaogan, Sta. Catalina, akto a nasukalan dagiti polis ti panaglako ni Albert Rapada y Carta iti paputok bayat ti panagpatroliada iti nadakamat a barangay idi agarup 11:30 ti rabii ti Disiembre 29.

Nasiputan dagiti polisĀ  iti sanguanan ti sari-sari store ni Rapada ti maysa a menor de edad a nangibato iti paputok.

Nagtaray nga immadayo ti di nabigbig a menor de edad idi nakitana dagiti polis.

Iti inwayat dagiti polis nga ocular inspection iti sari-sari store ni Rapada, nasukalanda dagiti paputok iti uneg ti tienda.

Awan ti naipakita ni Rapada a permitna nga aglako iti paputok isu a kinumpiska dagiti polis dagitoy sada impan iti police station para iti disposision.

Sadiay Cabugao, tallo a tao ti tiniliw dagiti polis idinto a sinamsamda dagiti lako dagitoy nga illegal a paputok bayat ti panagsukimatda kadagiti puesto iti tiendaan publiko ditoy nga ili idi bigat ti Disiembre 31.

Natiliw nga aglaklako iti illegal a paputok da Dolon Ampatua y Bayabaw, 65, naasawaan, residente iti Brgy Quezon; Al-banie Mustapha y Benito, 31, naasawaan,Ā  residente iti Brgy Rizal; ken Alimodin Engkila y Mustapha, 18, awanan asawa, ken residente iti Brgy Quezon.

Nasamsam ti lako ni Ampatua a 71 boxes a Super King (pop-pop); 6 rims a Corsair (piccolo) ken 73 boxes a Corsair (piccolo); 32 boxes a pop-pop a lako ni Mustapha ken 21 boxes aĀ  piccolo keb 35 boxes a pop-pop a lako ni Engkila.

Sadiay San Juan, nangiwayat ti kapolisan idi agarup 1:10 ti malem ti Disiembre 31 iti buy bust operation maikontra iti dua a tienda a nagresulta iti pannakakumpiska dagiti illegal a paputok a lako dagitoy.

Sinamsam dagiti polis ti maysa a bassit a box (cigarette type) a piccolo nga agbalor iti P15.00 manipud iti stall ti 3JC a kukua ni Graciel Caparida Castillo, residente iti Barangay Bannuar; idinto a maysa a back pack bag a nagkarga iti walo nga elongated boxes ti piccolo nga agbalor iti P800.00 manipud iti stall ti Rabajaā€™sĀ  Fireworks a kukua ni Jason Rosario y Morano, 27, naasawaan ken residente iti Barangay Bannuar, San Juan.

Napasubli dagiti polis ti dua a tig-P20.00 nga inaramatda a marked money iti transaksion.

Naipan iti police station dagiti sinamsam dagiti polis a paputok agraman dagiti akinkukua ken maysa a helper nga agnagan Rogelio Raguindin, Jr. Y Cudiamat, 17, para iti umisu a disposision. (Tawid News Team)