4 aksidente iti lugan, nagsasaganad napasamak

BANTAY, Ilocos Sur – Manipud idi Hulio 19 agingga iti Hulio 22, nagsasaganad dagiti aksidente a napasamak iti sumagmamano nga ili ditoy probinsia a nakainbolbaran dagiti motorsiklo a nagresulta iti pannakatay ti maysa ken pannakadundunor iti innem pay, daytoy ti report a dimmanon iti Police Provincial Office ditoy.

Idi malem ti Hulio 22, naikras ti motorsiklo a minaneho ni Jelly Ann Bisenio y Dameg, 18, residente iti Barangay Calungboyan, Santa, Ilocos Sur gapu iti pannakadungparna iti bulos a kalding sadiay Barangay Mabilbila Norte, Santa, Ilocos Sur.

Iti panagimbestiga dagiti polis, agdaldaliasat ti Euro 150 a motorsiklo a minaneho ni Bisenio iti national highway nga agpaamianan idi nakadungpar iti nagballasiw a bulos a kalding a puon ti pannakaikras ti luganna.

Naitaray nga immuna ni Bisenio iti Santa Rural Health Unit sa naiyalis iti Gabriela Silang General Hospital, Tamag, Vigan City.

Iti sabali a damag, saanen a naidanon iti Sta. Lucia District Hospital a sibibiag ni Rogel Aunor y Humbrebueno, 23, idinto nga awan ti puot ni Jaylord Acosta y Tayugnug, 18, nagmaneho iti Euro motorcycle gapu kadagiti dunorda iti nadumaduma a paset ti bagida gapu iti pannakaikras ti luganda kalpasan a dinungparda ti kongkreto a barrier ti maar-aramid a kalsada iti Barangay Catayagan, Sta. Lucia, Ilocos Sur idi agarup 11:05 ti rabii ti Hulio 19.

Segun iti polis, awan ti aruat a helmet dagiti dua a biktima idi maaksidenteda.

Iti sabali nga aksidente, naikras ti motorsiklo a minaneho ni Randy Aldesa y Mantallan, 29, naasawaan, ken residente iti Barangay Ora West, Bantay, Ilocos Sur gapu ta nailabsong iti nauneg nga abut iti kalsada sadiay Barangay Aggay, Bantay, Ilocos Sur idi agarup 8:30 ti rabii ti Hulio 19.

Nagsagrap ni Aldesa kadagiti sugat ket naitaray iti Metro Vigan Multi-Purpose Cooperative Hospital, Bantay, Ilocos Sur para iti pannakaagasna.

Awan met ti aruat ni Aldesa a helmet idi maikras ti chop-chop a motorsiklona a Honda Dio I.

Gapu iti dua a lawas a panagnepnepna, adda dagiti paset ti kalsada ditoy nga ili a nagabut-abut.

Kabayatanna, menor de edad ti nagkalugan iti motorsiklo a nakadungpar iti maysa nga ubing idi bigat ti Hulio 19 sadiay Barangay Bannuar, San Juan, Ilocos Sur.

Segun iti inbestigasion, nagballasiw ni Steven Savedra y Vivit, 8, Grade 3 pupil ken residente iti Barangay Lapting, San Juan iti kalsada a naggapu iti laud nga abaga ti kalsada ket idi makadanon iti daya nga abaga ti kalsada, dinungpar ti napegges ti tarayna nga agpaamianan a Rusi motorcycle a minaneho ni Daren Salvio y Doot, 14, kasakayna ni Joepert Ventura y Argel, 14, agpada a high school students ken residente iti Barangay Refaro.

Nagsagrap ti biktima iti dunor iti ulona idinto a garumiad iti nadumaduma a paset ti bagida ti linak-am da Salvio ken Ventura ket naitarayda amin iti Pira Hospital, Cabugao para iti medical treatment.#