4 akto a nasukalan nagpukan iti sagat

VIGAN CITY – Naipaiman iti opisina ti CENRO ken DENR ti rekord mainaig iti kaso ti mapapati nga illegal a panagpukan iti kayo iti kabakiran a paset ti Sitio Bulalayao, Barangay Silag, Sta. Maria, Ilocos Sur idi bigat ti Mayo 14.

Naiyawaten ken Regino Villacillo y Villarin, forest ranger ti CENRO, ken ni Dominador Tabion y Castillo, forest protection officer ti DENR, dagiti nasao a rekord mainaig iti nasao a panagpukan iti sagat a nakatiliwan iti uppat a tattao.

Natiliw dagiti polis ti Sta. Maria iti panangidaulo ni PSI Reynaldo C. Mendoza, Jr., kaduada ni Municipal Environment and Natural Resources Officer Arwin Vendiola ti uppat a lallako iti akto nga agipempempen iti 105 a kapukpukan a sagat.

Nabiogbig dagiti suspek a da Guillermo Alagadan y Acosta, 51, naasawaan, mannalon; Julius Agosto y Agosto, 19, baro; Robert Acosta y Rabara, 42, naasawaan, agpapada a residente iti Barangay Dan-ar, Santiago, Ilocos Sur; ken ni Raymundo Baldos y Galimba, 37, baro, tricycle driver, ken residente iti Barangay Langlangca Segundo, Candon City.

Nakalibas ti maysa a Renato Baldos y Galimba ti Barangay Dan-ar, Santiago.

Saan a nailanad iti report no mano ti balor dagiti napukan a sagat#