4-aldaw a panagtrabaho iti makalawas, naipakat

SAN FERNANDO CITY – Uppat laengen nga aldaw ti panagtrabaho dagiti empleado ti gobierno ti siudad ditoy para iti bulan ti Abril ken Mayo.

Nangrugi idi Abril 1 ken agpatingga inton Mayo 31, manipud Lunes agingga iti Huebes, sumrek dagiti empleado ditoy iti alas siete ti bigat ken agretiroda iti alas 5 ti malem ket saandan a sumrek iti Biernes.

Segun ken ni Mayor Pablo Ortega, babaen daytoy nga iskema, umatiddog ti weekend dagiti empleado ditoy ket umad-adu ti tiempoda para kadagiti pamiliada.

Nupay kasta, kinuna ni Ortega a saan a karaman iti daytoy baro nga iskema dagiti empleado iti city health office gapu ta 24 nga oras ti ipaayda a serbisio.

Babaen daytoy nga iskema, makainut pay ti gobierno ti siudad iti panagaramatna iti koriente ken maintenance costs.

Maipalagip nga impakat ni Presidente idi Gloria Macapagal-Arroyo daytoy nga iskema tapno makainut ti gobierno gapu iti simmuyop a presio ti lana idi 2005. (Manipud iti report ni Monette H. Herrera, PIA, La Union)