4 baka, natakaw, naparti

SAN JUAN, Ilocos Sur – Uppat a baka ti natakaw iti talon a nakaiwaywayanda sa mapapati a naparti ken naikargada iti maysa a lugan idi parbangon ti Oktubre 12.

Mismo a nagpulong iti kapolisan ditoy dagiti akinkukua kadagiti natakaw a baka a da Ismael Faraon y Gorospe, 25, naasawaan, mannalon; Sonny Valle y Vagay, 32, naasawaan; ken Ivan Valorozo y Rapacon, 46, naasawaan, residenteda amin iti Barangay Sabangan, San Juan.

Masikog a puraw a baka nga agbalor iti P30,000.00 ti natakaw ken ni Faraon; dua a babai a baka (kolor daga ken puraw) nga agbalor iti P20,000.00 ken P30,000.00 ken ni Valle; ken babai a baka a puraw ken ni Valoroso nga agpateg iti P30,000.00.

Kas maibatay iti report, ni Faraon ti immuna a nakaduktal a natakaw ti bakana idi agarup 6:00 ti agsapa ti Oktubre 13 ket pinakaammuanna dagiti kalugaranna sada binirok dagiti tarakenda ngem saanda a nasapulan ida.

Ngem iti follow-up investigation dagiti polis-San Juan, nakasarakda kadagiti naguneg ti baka iti kataltalonan iti bisinidad ti Barangay Guimod, San Juan a mapapati nga imbati dagiti nagparti kalpasan nga inkargada dagiti karne iti di ammo ti klasena a behikulo.

Narekobre pay iti nagpartian kadagiti baka iti maysa a dark blue hood ti diaket a mapapati nga aruat ti maysa kadagiti nagtakaw.

Agtultuloy ti inbestigasion no asino dagiti nagtakaw kadagiti baka.

Daytoy ti maikadua a gundaway nga adda naireport a natakaw ken naparti a baka. Idi napan a bulan, naireport a natakaw ti baka ni Herlinda Villamar y Atanacio, 56, naasawaan, ken residente iti Sitio Ubbog, Barangay Patong ket naaresto dagiti suspek a da Dennis Paz y Rosario, 34, residente iti Sitio Cabuluan; Fermin Ustari, y delos Santos, 48, residente iti Sitio Lattao; Archie Garcia y Garcia, 33; Alexis Aquitania y Lira; ken Nelson Quilinderino, residenteda amin iti Barangay Patong, Magsingal, Ilocos Sur.

Inannugot dagiti suspek nga idi parbangon ti Septiembre 19, inukodda ti baka bayat a nakawayway daytoy sadiay Sitio Ubbog, Barangay Patong, Magsingal sada pinarti ken nagbibingayan.

Ngem pinakawan ida ni Villamar idi inkari dagitoy nga agbayadda iti P15,000.00 a naituding a balor ti pinartida a baka.

Kitkitaen dagiti inbestigador no sangsangkamaysa a grupo dagiti nagtakaw iti baka sada pinarti. (Tawid News Team)