4 Chinese nationals, naaresto gapu iti panagikutda kadagiti armas

PASUQUIN, Ilocos Norte – Uppat a Chinese nationals ti natiliwan dagiti polis nga agikut kadagiti paltog ken eksplosibo bayat ti panagtsekpointda sadiay Barangay Davila ditoy nga ili idi rabii ti Mayo 27.

Nasukalan dagiti polis iti uneg ti lugan da Dang Hoi, Lui Xin, Lei Guang Feng ken Dennis Co, agpapada a Chinese nationals, ti walo a granada, 3 nga MP5 submachine guns, maysa a 40-cal rifle, 2 a cal .45 pistols,  9mm Glock pistol, Pietro Beretta pistol, balbala ken improvised nga eksplosibo iti impasdekda a checkpoint iti nadakamat a barangay.

Sakbayna, naalerto dagiti polis babaen dagiti lumugar ti kaadda dagiti tattao a nangriribuk iti maysa a paggasolinaan sadiay Barangay Nagsanga, ditoy nga ili.

Mapapati a nagiburak pay dagiti suspek kadagiti botelia.

Idi nagresponde dagiti polis, mapapati a naglibas dagiti suspek a nakalugan iti Toyota a kotse ngem kimmamat dagiti polis agingga a natsekpoint ti lugan sadiay Barangay Davila.

Inaresto dagiti polis dagiti suspek idi mapapati nga awan ti naipakitada a dokumento kadagiti armas ken eksplosibo a nasukalan iti uneg ti luganda.

Kinuna ni Supt. Jeffrey Gorospe, spokesman ti Ilocos Norte Provincial Police Office, a makasuan dagiti Chinese nationals iti panagsalungasing iti RA 9156, RA 8294 ken panaglabsing iti gun ban law.

Ngem babaen ti maysa nga interpreter, pinaglibakan dagiti suspek a kukuada dagiti armas ken eksplosibo a nasarakan iti luganda.

Inkalinteganda nga  inupaanda laeng ti lugan.

Ngem segun iti maysa nga opisial ti Bureau of Immigratioin and Deportation, ad-adalenda ti sabali pay a kaso a maisaklang kadagiti uppat agsipud ta mapapati nga awan ti bisada ken dadduma pay a dokumento.

Kinuna pay ni Paul Verzosa, hepe ti BID, a mabalin a miembro dagiti naaresto iti grupo dagiti agkidkidnap gapu ta mapapati a karaman kadagiti nakumpiska dagiti polis iti lugan dagiti silencer ken duct tape.#