BANNER NEWS: 4 cop killers, nakasuan murder, frustrated murder

BANTAY, Ilocos Sur – Dua a nagsina a kaso ti naipila iti provincial prosecutor’s office iti Vigan City maikontra kadagiti agkakabsat a nangbagbagsol iti maysa a polis ken ti asawana a maysa met laeng a polis idi rabii ti Disiembre 30 iti barangay plaza ti Cabaroan, ditoy nga ili.

Nagsina a kaso ti murder ken frustrated murder ti naipila maikontra kadagiti uppat nga agkakabsat a Ronnie, Rolly, Roberto ken Roger Bautista gapu iti panangbagbagsolda a nakatayan ni PO2 Rufino Rapacon y Yabes, 36, ken iti pannakairamraman a pannakadangran  ti asawana a ni SPO1 Florence Rapacon, 34,  agpada a kameng ti PNP iti Ilocos Sur Provincial Police Office.

Nagsagrap ni Rapacon kadagiti sugat iti nadumaduma a paset ti bagina ket naideklara nga awanen ti biagna idi maidanon iti St. James Hospital iti Vigan City.

Nagsagrap met ni Florence Rapacon iti bagsol iti makannawan a paset ti bagina idi napan nagarayat ket nakaro ti kasasaadna iti ospital a nakaitarayanna.

Tallo ti tama ti paltog iti nadumaduma a paset ti bagina ni Ronnie Bautista idinto a nagsagrap iti laceration ni Rolly Bautista iti ulona.

Mapapati a dinaanan dagiti suspek ti biktima iti barangay hall gapu iti saan a pannakaituloy ti basketball tournament kas pangparagsak iti panagpiesta ti nadakamat a barangay.

Segun iti report a dimmanon iti provincial police office ditoy, pinagtalna ni Rapacon dagiti agkakabsat ngem mapapati nga impettak ni Roger ti botelia ti serbesa ket daytoy ti imbagsolna iti sumagmamano a daras ken ni Rapacon.

Mapapati a binagsol met ni Rolly babaen ti imuko ti polis.

Napan naganawa ni SPO1 Rapacon ngem mapapati nga induron da Ronnie ken Rolly ket maysa ti nangbagsol kenkuana a nakatumbaanna. Nupay kasta, mapapati a nauksot ti babai a polis ti paltogna ket nagpaputok a nakatamaan ni Ronnie.

Nangiwayat ti polis Bantay nga indauluan ni OIC, Police Senior Inspector Benedicto Cardenas iti hot pursuit kadagiti suspek ket natiliwda da Roger ken Roberto Bautista.

Maysa a saksi, ni Levi Liberato y Hidalgo, 35, ken residente iti nadakamat a lugar, ti nangpadas a naganawa idi makitana ti panagiinnagaw da SPO1 Rapacon ken ni Rolly iti paltog ngem nagkanalbuong daytoy ket natamaan ti makannigid a sakana.

Maysa pay a saksi, ni Sinamar Abenoja y Mercurio, 24, naasawaan, ken residente met iti nadakamat a barangay, ti nagkuna a bayat ti panagtarayna nga apan agpaarayat iti police station, pinaltogan ti di pay ammo a tao a nakapuntaan ti makannigid a paset ti bukotna.

Nakarekobre ti SOCO team manipud iti Ilocos Sur PPO iti maysa a 9 mm Taurus pistol, 9 a nagawangan a kapsula ken maysa a napitpit a buli daytoy a paltog, maysa nga imuko ken maysa nga screwdriver iti nakapasamakan ti krimen.

Agtultuloy ti panagkalap dagiti polis kadagiti impormasion nga adda pakainaiganna iti pannakapapatay ni Rapacon.#