4 insidente ti illegal discharge of firearm, naireport

VIGAN CITY – Iti baet ti kampania ti kapolisan maikontra iti panagraira iti paltog, uppat a nagsisina nga insidente ti panagpaputok a pakaibilangan ti maysa a retirado nga opisial ti Philippine Army ti naireport iti Candon ken ditoy siudad itay nabiit.

Iti Candon City, idi agarup 8:30 ti Disiembre 5, inaresto dagiti polis ni Ronaldo Reyes y delos Reyes, 45, naasawaan, retirado iti Philippine Army nga addaan iti ranggo nga staff sargeant ken residente iti Barangay Cubcubbuot, Candon City gapu iti illegal dischargen of firearm.

Timmawag ni SPO1 Jerry Valdez, PNP member ti Candon CPS ken residente iti nadakamat a barangay kalpasan a naminpito a daras a nagpaputok ni Reyes idinto a mapapati a nagprobokar kadagiti kaarrubana.

Nagresponde dagiti polis ket kinumpiskada ti armas ti suspek a maysa nga Armscor Cal. 45 pistol nga addaan maysa a magasin a naglaon iti 4 a bala.

Nakarekobre pay dagiti polisniti 7 a cartridge cases ken maysa a bala iti dayta met laeng a kalibre ti paltog sumagmamano a metro iti abagatan a terasa ti balay ti suspek.

Nupay adda imparang ti suspek ti Firearms License Cardna iti nakumpiska a paltogna, nakasuan iti alarm and scandal a nai-docket iti babaen ti  NPS # 1-13-INQ-13L-00168.

Iti Vigan City, nakasuan ti illegal discharge of firearm ken panagsalungasing iti RA 10591  da John Palce y Roldan, 36, naasawaan, ken residente iti Barangay Capangpangan; Patrick Amian y Adame, 41, naasawaan ken residente iti Barangay Pantay Daya; ken Joseph Alibin y Paz, 23, baro, ken residente iti Barangay San Julian Norte.

Segun iti report, idi agarup 6:26 ti malem ti Disiembre 7,  timmawag ni Capangpangan Barangay Captain Vicente Criste iti polis ket inreportna ni Palce nga agprobprobokar iti lugarda ken nagpaputok babaen iti homemade shotgun (paltik).

Nakarekobre dagiti polis iti tallo a naiputok a bala manipud iti gauge 12 shotgun.

Kinumpiska dagiti nagresponde a polis ti paltog ni Palce sada impan daytoy iti police station para iti naan-anay nga inbestigasion ken umisu a disposision.

Kabayatanna, idi agarup 8:45 ti sardam ti Disiembre 7, mapapati a nagprobokar ken pinaturongan ni Patrick Amian da Florie Almo y Peralta, 34, ken Jomar Caberto y Vabanilla, 18, baro, agpada a residente iti Barangay IV, bayat ti maysa a birthday party a naangay iti paraangan ni Jomar Parel y Peralta, iti Barangay Pantay Daya.

Pinagkalma ti ama ti nagkasangay ni Amian ngem nagpaputok ketdi daytoy.

Inaresto dagiti nagresponde a polis ni Amian ket naipan iti Gabriela Silang General Hospital para iti medico legal examination sa naikustodia iti police station.

Idi met agarup alas 10:00 ti bigat ti Disiembre 9, insuko da Barangay Captain Restituto Arcena y Soria, iti polis ti maysa a cal. 22 paltik revolver, a kinumpiskada ken ni Joseph Alibin y Paz.

Naireport a bayat ti panagpatrolia da Barangay Kagawad Charles Manzano y Viloria, kaduana dagiti barangay tanod, nakangegda iti nagsasaruno a kanalbuong a naggapu iti laud a direksion.

Nagturong dagitoy iti naggapuan ti kanalbuong ket natuntonanda ti suspek nga adda iti maysa a kasangay.

Kinumpiska da Manzano ti paltog ti suspek a naisab-it iti siketna sada impan iti barangay hall sakbay nga impaimada iti kustodia dagiti polis-Vigan.#