4 lalaki a kimmabil kadagiti polis, napilaan iti kaso

SANTIAGO, Ilocos Sur – Pati dagiti polis a pakaibilangan ti deputy chief of police ket kinabil dagiti makapungtot a lalaki a nakaimatang iti panangisubusob ti maysa nga 18-wheeler truck iti dinungparna a traysikel sadiay Barangay Caburao, ditoy nga ili idi malem ti Mayo 10.

Naglak-am kadagiti disnog ni Adonis Tenio y Ayson, 29, ken residente iti Barangay Bessang, Burgos, Ilocos Sur manipud kadagiti lallaki a mapapati a kabagian ni Maricon Afuan y Santiago, nagmaneho iti Honda XRM motorcycle a dinungpar ken insarubsob ti International 18-wheeler truck a minaneho ni Tenio.

Uray dagiti polis a nangtiliw ken ni Tenio kalpasan ti aksidente a pakaibilangan da Deputy Chief of Police, Inspector Joel Molina Castillo, PO2 Donard Sagada, ken PO2 Edward Ramolete ket naglak-am kadagiti disnog a nakadunoranda.

Naitaray dagiti polis iti Candon General Hospital tapno maagasan dagiti dunorda.

Napukaw pay ti relo ni Molina a mapapati a rinabsut ti maysa kadagiti nangdangran kadakuada.

Nabigbig ti uppat kadagiti suspek a da Omar Pascua y Garnace ken Michael Pascua y Aglibut, agpada a residente iti Barangay Lintik, Banayoyo, Ilocos Sur; Dominador Velasco y Obilla ken Bernardo Gene y Tobias, agpada a residente iti Barangay Cadanglaan, Banayoyo.

Kanaig daytoy, napilaan iti provincial prosecutor’s office, Vigan City iti kaso a direct assault and robbery maikontra kadagiti dua a Pascua, ni Velasco ken Genes ken tallo pay a di nabigbig a suspek a nabirngasan kas Peter Doe, John Doe ken Paul Doe.

Napilaan met ni Tenio iti kaso a reckless imprudence resulting to double homicide, serious physical injuries and damage to property iti provincial prosecutor’s office.

Sakbayna, dinungpar ti 18-wheeler truck a minaneho ni Tenio ti XRM motorcycle a minaneho ni Maricon Afuan y Santiago, 40, awanan asawa, ken residente iti Barangay Lintik, Banayoyo ken nagsakayan dagiti agkabsat a Louisa Marie Gamata y Afuan, 6, ken Charlene Gamata y Duarte, 11, idi malem ti Mayo 10.

Segun iti report, agpaabagatan a direksion ti Honda XRM motorcycle a minaneho ni Afuan idi dinungpar ti nataray nga International 18-wheeler truck ti kutitna ket naidarusdos ti traysikel iti sumagmamano a metro manipud iti point of impact ken puon ti nakaipalladawan dagiti ubbing.

Naitaray dagiti biktima iti Candon General Hospital ngem indeklara ti doktor a dead on arrival ni Louisa Marie.
Kabayatanna, maysa a traysikel ken dua a motorsiklo ti nainbolbar iti aksidente a napasamak iti national highway sadiay Barangay Sabuanan ditoy nga ili idi parbangon ti Mayo 11 a nakatayan ti maysa ken nakasugsugatan dagiti dadduma pay a naglugan.

Awanen ti biag ti nagmaneho iti Yamaha Mio motorcycle a ni Kevin Gomintong y Pilayan, 20, baro, idi maidanon iti Candon City Hospital.

Nagsagrap met iti dunor iti nadumaduma a paset ti bagina ti insakay ni Gomintong ni Mark Paul Omaoeng y Damalia, 28, baro, residente met laeng iti Barangay Capariaan, Sta. Cruz, Ilocos Sur.

Nasugatan met ni Johnny Rosendo y Bayatin, 63, naasawaan, barangay kagawad, ken ti asawana a ni Tessie Rosendo y Quilly, 61, agpada a residente iti Barangay Guardia, Banayoyo, Ilocos Sur; ni Ernesto Baguioen y Baguayan, 47, naasawaan; ken dagiti nakisakay a da James Daplaoen y Reconsal, 42, baro; ken ni Reynaldo Pablan y Arce, 35, naasawaan, agnaedda amin iti Barangay Villa Garcia, Sta. Cruz, Ilocos Sur.

Naammuan iti inbestigasion nga agpaamianan a direksion ti Euro tricycle a minaneho ni Rosendo idinto nga agpaabagatan ti Yamaha Mio motorcycle a minaneho ni Gomintong ken ti Honda XRM 125 a minaneho ni Baquioen ket iti paset a sakup ti Barangay Sabuanan, mapapati nga inobertekan ti HRM motorcycle ti Yamaha Mio ngem nasapgidna daytoy a puon ti pannakapukaw dagiti drayber iti kontrolda iti manibela ken pannakatinnagda.

Mapapati a kimmaut ti XRM motorcycle iti bangir a linia a puon ti nagdinnungparanda iti Euro tricycle ken nagsagrapan ni Rosendo iti nakaro a sugatna iti makannigid a sakana.#