4 lalaki, napaltogan iti riri iti videoke bar

BANTAY, Ilocos Sur – Uppat a lallaki ti napaltogan idi agsapa ti Nobiembre 13 a mapapati a nagramut iti riri iti uneg ti maysa a videoke bar iti Barangay Puspus, ditoy nga ili.

Napaltogan da Randolf Abigania y Rabe, 27, naasawaan; Alex Raboy y Arconado, 38, naasawaan; ken Ignacio Mendoza y Rabe, 38; agpapada a residente iti Barangay Fatima, Vigan City iti sanguanan ti Butt and Balls Videoke Bar a masarakan iti Barangay Puspus, ditoy nga ili idi agarup 1:20 ti agsapa ti Nobiembre 13.

Nainaganan ti pimmaltog kadakuada a ni Denmark Presto y Carpio, 18, ken residente iti Barangay Ora East, Bantay, a naglibas kalpasan ti pammaltog ket agdama a birbiroken dagiti polis.

Nasugatan met ni Rex Bilgera y Domenden, 29,  ken residente ti Barangay Ora West, Bantay, Ilocos Sur, mapapati a kadua ni Presto idi napasamak ti pammaltog iti sanguanan ti videoke bar.

Iti inisial a panagimbestiga dagiti polis, nagkukuyog a napan iti nasao a videoke bar tapno uminom da Abigania, Raboy ken Mendoza, kaduada da Jan Bilgera y Estefa, 26, naasawaan; ken Mark Julius Abundo y Bernaldez, 19, kalugaranda met laeng iti Barangay Fatima, Vigan City.

Segun iti panangisalaysay ni      Abigania ken ni Peter Rebunal ti DWRS Barangay Commando Brigada, kasangsangpetda pay laeng iti videoke bar idi mapapati nga inasitgan ida ni Presto sana kinompronta no sino ti kalalakian kadakuada. Mapapati a nagdinnuron ti suspek ken ni Abigania.

Pimmanaw ti suspek ngem nagsubli nga addan kakaduana ket nagsusubangda kadagiti biktima iti sanguanan ti videoke bar a nagtungpal iti pannakidinnanog ti maysa kadagiti biktima ken iti suspek.

Mapapati nga inuksot ti suspek ti paltogna sana pinaputokan dagiti biktima.

Nagsagrap ni Abigania iti sugat iti makannigid a luppona, ni Raboy iti makannawan a gurong ken makannigid a luppona, ken ni Mendoza iti makannawan a luppona ket naipaagasda amin iti Metro Vigan Cooperative Hospital.

Kinuna ni Abigania nga awan ti ammona a nakabasolanda iti suspek ta dida am-ammo ken iti daydi la a rabii a nakitada daytoy.

Nupay kasta, kinunana nga am-ammoda ni Bilgera a kadua ti suspek agsipud ta padada nga agpaspasada iti traysikel ken naikamang iti barangayda.

Nakarekobre dagiti nagresponde a polis iti walo a kapsula ken maysa a buli a nagtaud iti cal. 45 iti nakapasamakan ti pammaltog.

Nangisayangkat dagiti polis iti pursuit operation maikontra iti suspek ngem saanda a nabirokan.

Di mabayag, nakaawat ti polis iti tawag manipud iti maysa a barangay official ti Ora West a nangipakaammo a biktima ti pammaltog ni Rex Bilgera y Domenden.

Ni Bilgeria ti nadakamat dagiti taga-Vigan City a kadua ni Presto idi nakaririda daytoy iti videoke bar a nagtungpal iti pannakapaltogda.#