4 lalaki, natiliw nga agsusugal

NARVACAN, Ilocos Sur – Uppat a lalaki ti tiniliw dagiti polis ditoy idi malem ti Hunio 22 gapu ti panagsusugalda iti baraha iti pagparkingan ti traysikel iti tiendaan publiko ditoy.

Nainaganan dagiti nagsusugal a da Flaridel Inong y Cabote, 24, ken Karl Mark Sagun y Floria, 26, agpada nga agnaed iti Barangay Paratong; Lester Asistin y Castaneda, 20, baro ken residente iti Barangay Margaay; ken ni Wilfredo Cabasan Jr. y Molina, 27, naasawaan, ken residente iti Barangay Turod.

Natiliwan dagiti polis nga agsusugal dagiti uppat iti Rakatak, maysa a sugal iti baraha, ket kinumpiskada ti bet money nga agdagup iti P65 iti nadumaduma a denominasion.

Napilaan iti kaso a panaglabsing iti PD 1602 dagiti uppat iti 4th MCTC Narvacan.#