4 lallaki a pakairamanan 3 a menor de edad, nakasuan iti panagtakaw

VIGAN CITY – Uppat a lallaki a pakairamanan ti tallo a menor de edad ti nakasuan iti panagtakaw a nagsaruno a naisayangkat ditoy siudad itay nabiit.

Nakasuan da Randy Pangasinan y Villamor, 22, baro; Nickson Abejon y Villanueva, 17, baro, out-of-school youth; ken Rickson Urbano y Caseres, 15, baro, agpada a residente iti Barangay Tamag ditoy siudad gapu iti insayangkatda a panagtakaw iti maysa a storage house iti Barangay Tamag ditoy siudad idi Nobiembre 10.

Sinerrek da Pangasinan, Abejon ken Urbano ti storage house a kukua ni Myrna Navarro y Bueno, 49, balasang, residente iti Barangay Busiing, San Ildefonso, Ilocos Sur babaen ti panangikkatda iti sarming ti tawa iti comfort room iti likud ti bodega sada intaray dagiti 3 a tangke ti gas.

Naipilan ti kaso a robbery maikontra kadagiti suspek iti city prosecutorÔÇÖs office, Vigan ket naruk-atanen ni Pangasinan iti kustodia ti polis idinto a naipaiman da Abejon ken Urbano iti City Social and Welfare Development office.

Kabayatanna, maysa met a menor de edad ti naitudo a nangtakaw iti wallet ni Sister Lillian Carranza y Estra├▒ero, 55, madre iti Caritas Nueva Segovia, Vigan City a nakapukawan ti 2 nga ATM cards, cash money nga agdagup iti P16,500 ken $100.

Segun iti biktima, imbatina ti bagna iti uneg ti opisinana ket idi agsubli, nakalukaten daytoy ken awanen ti petakana.

Nabigbig ni Jayson Padsing y Puled, 21, baro, social worker ti Caritas ni Arellano a nakitana a rimmuar iti opisinada babaen dagiti retrato nga impakita ti polis kenkuana.

Naammuan nga addan dagiti kaso ti suspek a panagtakaw ket naipaiman iti regional social welfare and development office ngem naglibas daytoy.

Idi napan dagiti polis iti pagtaengan ti suspek, kinuna dagiti dadakkelna a nabayagen a saan a naggawid ti suspek.

Iti pannakaisurat daytoy, di pay nakemmeg ti suspek.#

Kabayatanna, natakawan ti Footstep Store a masarakan iti umuna a kadsaaran ti Landmark building iti Jose Singson Street, Barangay VIII idi parbangon ti Nobiembre 7; ken ti RCA Cellphone and Accessories iti nagsulian ti Mabini Street ken Quezon Avenue, Barangay I idi Nobiembre 9.

Naammuan ti panagtakaw iti Footstep Store idi inreport ti guardia ti Landmark building a nakalukat ti ruangan ti pagtagilakuan idi mapan aginspeksion iti bambantayanna a pasdek.

Iti panagimbestiga dagiti nagresponde a polis, napursar a naluktan ti roll-up door ti pagtagilakuan ken awan ti maysa a padlock ti ruangan.

Segun ken ni Tanjo, imbatida ti tulbek ti ruangan ken ni Carl Earl Lawrence Viesca y Magno, stocker, agnaed iti San Antonio, Nueva Ecija ken aggigian iti Rizal Street, Barangay VII, Vigan City.

Idi mapan kitaen dagiti polis ti suspek iti pagkaseraanna, awan ti suspetsa ken dida makontak iti selponna.

Inreport met ni Konsehal ti Vigan Audie Agdamag iti polis ti panagtakaw iti RCA Cellphone and Accessories idi agarup alas 7:22 ti bigat ti Nobiembre 9.

Naduktalan ti panagtakaw idi inreport ti street sweeper ken Agdamag, akinkukua iti Agdamag building, a nakaibalayan ti nasao a negosio, a nakitana a nakalukat ti pagtagilakuan.

Iti panagimbestiga dagiti polis, naaammuan a nakastrek dagiti mannanakaw iti pagtagilakuan babaen ti panangputedda kadagiti steel bars ti ruangan.

Kinasakas dagiti mannanakaw ti 6 a nadumaduma a matartarimaan a selpon nga agpateg iti P53,500.

Di pay nabigbig dagiti nagtakaw.#