4 lugan nagkarambola, 4 nadundunor

BANTAY, Ilocos Sur – Uppat a lugan ti nainbolbar iti aksidente iti national highway a sakup ti Barangay Boquig ditoy nga ili idi sardam ti Disiembre 17 a puon ti nakadunoran ken nakayospitalan ti uppat a tattao.

Kas maibatay iti blotter, agpalaud a direksion ti Euro motorcycle a minaneho ni Ian Bong Ivany Mercurio y Camelo, 19, baro, ken residente iti Sinabaan, Bantay, Ilocos Sur ken ti Motorstar a minaneho John Mark Domenden y Dela Rosa, 20, baro, ken residente iti Tay- ac, Bantay, Ilocos Sur ket idi nakagtengda iti Brgy. Boquig, Bantay, Ilocos Sur iti agarup 7:25 ti sardam ti Disiembre 17, maysa a di nabigbig a kotse manipud iti amianan a ruar ti linia ti nagsenial a sumrek iti highway nga agpalaud isu a nagpakannigid bassit ti Euro ngem dita a sinapgid ti agobertek koma a Motorstar.

Gapu iti pigsa ti impact, naipabaribar ti Motorstar ket dinungparna ti sumungad nga agpadaya a traysikel a minaneho ni Benjamin Capablanca y Bintoy, 59, naasawaan ken residente iti Aggay, Bantay, Ilocos Sur.

Napukaw ni Capablanca ti kontrolna iti manibela ket dinungparna ti Hyundai Starex a nakaparking iti abagatan a ruar ti linia a nakasango iti laud.

Naitaray iti Metro Vigan Cooperative Hospital dagiti drayber ti motorsiklo agraman ti backrider ti Motorstar a ni Edison Domenden y Pescador, 20, baro, ken residente iti Tay-ac, Bantay, Ilocos Sur.

Naitaray met iti Gabriela Silang General Hospital ti drayber ti traysikel para iti pannakaagas ti dunorna iti ulona.

Nakaro ti dadael dagiti dua a motorsiklo ken tricycle idinto a naikkat ti door handle ken limnek ti makannawan a paset ti Hyunai Starex.

Agtultuloy ti inbestigasion mainaig iti nasao nga aksidente.#