4 luglugan, nagkarambola, 1 natay iti hit and run

TAGUDIN, Ilocos Sur – Uppat a luglugan ti nagkarambola iti national highway a sakup ti Barangay Libtong ditoy nga ili idi rabii ti Oktubre 21 a nak-igapuan ti pannakaatal ken pannakatay ti maysa a tao.

Nagkarambola ti maysa a Honda Wave motorcycle, maysa a Lifan 125 motorcycle, maysa a bisikleta, ken maysa nga owner-type jeep a nakaro a nakadadaelan dagiti nainbolbar a luglugan ken nakatayan ni Manuel Laysa, 46, naasawaan, ken residente iti Barangay Libtong ditoy nga ili.

Naammuan iti report nga agpaamianan ti bisikleta a minaneho ni Laysa ket agobertek koma ti sumarsaruno a Honda Wave a minaneho ni Yves Christian Lacasandile y Lazaga, 17, baro; ngem kellaat a nagpakannigid ti bisikleta a sumrek iti barangay road a puon ti nakasab-itan kenkuana ti Honda motorcycle.

Kas resulta, naruros iti bangir a linia ni Laysa idinto a naipalladaw ti drayber ti Honda a ni Lacasandile ken ti insakayna a ni James Paul Lizardo y Lazaga, 17, baro, iti agpaamianan nga abaga ti kalsada.

Mapapati a di napakadaan ti drayber ti Lifan 125 a ni  Bernard Joshua Dominguez y Parong, 17, baro, agnaed iti Barangay Tallaoen, Tagudin, Ilocos Sur, ti napasamak ket dinungparna ti Honda motorcycle idinto nga inatalan met ti owner-type jeep a minaneho ti di nabigbig a tao a naggapu iti abagatan ti naruros iti bisikleta a ni Laysa a puon ti nakatayanna a dagus.

Nagsagrap iti sugat iti nagduduma a paset ti bagida ti drayber ti Honda ken ti insakayna ken ti drayber ti Lifan motorcycle ket naitarayda iti Tagudin General Hospital and Capillariasis Center.

Nakaro ti dadael dagiti luglugan a nainbolbar iti aksidente.

Pinakaskas ti drayber ti owner-type jeep nga immadayo  iti abagatan a direksion ket nupay nangisayangkat dagiti polis Tagudin iti hot pursuit operation, saandan a nasapulan ti drayber a nangatal ken ni Layza.#