CAOAYAN, Ilocos Sur – Uppat a mangngalap ti inaresto dagiti polis gapu iti panagbongbongda iti kabaybayan a sakup ti Barangay Fuerte itay nabiit.

Nabigbig dagiti mangngalap a da  Eddie Molina y Quindipan, 44, naasawaan; Domingo Rabena y Basilio, 52, naasawaanl Godofredo Molina, Jr., y Ragucos, 36, baro; ken Lee Jay Rabena y Quario, 24, naasawaan.

Nagresponde dagiti polis iti babaen ti direkta a superbision ni Chief of Police, Senior Inspector Reynaldo Carrido Mendoza, Jr. idi nakaawatda iti impormasion nga adda maar-aramid a panagbongbong iti kabaybayan ti Barangay Fuerte.

Ngem idi makaasideg kadagiti suspek dagiti polis a naglugan iti motorboat, adda impuruak dagitoy a nalabaga a bag iti danum.

Nupay kasta, narekobre dagiti polis ti nasao a bag iti igid ti baybay ti nadakamat a barangay.

Nakakumpiskada pay iti ikut dagiti suspek ti 3 nga eksplosibo a naimuntar iti nagbukel a botelia ti Miguelito ken addaan iti blasting caps, 5 a fishing paraphernalia a maaw-awagan iti “karwas”, motorboat a napintaan iti berde ken nakaipintaan ti Sagrada Pamilia ken 3 pagbatok nga anteohos.

Naisaklang dagiti suspek iti panaglabsing iti RA 10591 iti Opisina ti Provincial Prosecutor, Vigan City.#