Footer

4 mapukpukaw a mangngalap, naalaw iti taaw

SAN FERNANDO CITY – Kinumpirma ti Philippine Coast Guard-Northern Luzon a naalaw a sibibiag nupay nakapsutda dagiti  aggaama a mangngalap a naireport a makalawasen a mapukpukaw iti taaw.

Segun ken ni Captain Athelo Ibañez, district commander ti Philippine Coast Guard nga akinsakup iti Amianan a Luzon,  inalaw dagiti limmabas a mangngalap a nakalugan iti bilog da Florendo Mostoles, Sr. 55, Florendo Jr., 22 ; Louie, 26; ken ni Jojo, 18, aggaama nga agpapada a tubo ti Dili, Sta. Cruz, Ilocos Sur ngem agnaeden iti Apatot, a nakakapet laeng iti pataw iti kabaybayan.

Iti panangberipika ti DZTP ken Tawid News Magasin ken ni Barangay Kagawad ti Apatot Reynaldo Oandasan, kinunana a naitaray dagiti aggaama iti  Tagudin General Hospital gapu iti kapsut ken bisinda.

Segun iti kagawad, nasarakan dagiti mangngalap a taga-Mantanas, Sta. Cruz, Ilocos Sur dagiti aggaama a kumkumpet iti pataw ti payao.

Naammuan pay a pinedped dagiti aggaama ti bisinda babaen ti pannanganda iti aragan ken babassit a shell.

Naireport a mapukpukaw dagiti uppat a mangngalap manipud pay idi Nobiembre 27 nga itatapogda iti baybay a nakalugan iti dua a bilog.

Kinuna ti kagawad a posible a napattog ti bilog dagiti agaama gapu iti napigsa nga angin.

Daytoy ti maikadua daras iti las-ud ti dua a bulan nga adda naitawtaw a mangngalap manipud iti daytoy a barangay.

Idi Nobiembre 12, timmapog iti baybay da Eldie Ray ken Ronnie Cabradilla, agpada a taga-Barangay Apatot ditoy nga ili ngem napattog ti bilogda ket nagkatangkatangda iti taaw iti dua nga aldaw.

Maysa a barko ti nakasalaw kadagiti mangngalap ket naipaimada kadagiti autoridad  idi simmanglad ti lugan iti Japan.

Babaen ti tulong ti embahada ti Filipinas iti nasao a pagilian, nakaawid met laeng dagiti mangngalap iti lugarda.#