BANNERl 4 naapput iti nagsina a pot session; 5 nakalibas birbiroken dagiti polis

VIGAN CITY- Uppat a lalaki a pakairamanan ti maysa a maestro ti naipiskot dagiti polis ngem nakalibas ti sabali pay a lima iti nagsina a pot session ditoy siudad.

Idi agarup 11:30 ti rabii ti Nobiembre 4, nakaawat dagiti polis ditoy iti text message manipud iti maysa a civilian informant nga innem a lalaki ti naireport a madama ti pot sessionda iti maysa a di nalpas a balay sadiay Barangay Capangpangan.

Nagresponde dagiti polis ket nakikoordinarda ken ni Barangay Captain Vicente Cristre ken Kagawad Erwin Piano sada nagturong iti saan a nalpas a balay ti maysa a Delbert Fetalvero a naiteks a pakaar-aramidan ti pot session.

Ngem nasiputan ida dagiti suspek ket dagusda nga inserra ti ridaw sada naglibas babaen ti ikakalay-atda iti sementado a diding.
Kinamat ida dagiti polis ngem malaksid ken ni Reynante Albalos Quiday, 39, baro, instructor, ken residente iti Don Dimas, Caoayan, Ilocos Sur, nakalusot dagiti lima a kakadua ti maestro.

Ngem nabigbig dagiti nakalibas a da Delbert Pugal Fetalvero, aka “Betlog”, naasawaan; Richmund Nisco Utanes, 18, baro; Arnold Forges aka “Annod/Kumaw”; Metring Torio ken maysa a babai a nabirngasan iti “Neknek”, agpapadada amin a residente iti Barangay Capangpangan, Vigan City, Ilocos Sur.

Nakasamsam dagiti operatiba iti nakaangayan ti pot session iti dua a naluktan a plastic sachet nga addaan mapapati a shabu residue, 2 improvised plastic totter; maysa nga improvised foil totter nga addaan masuspetsa a shabu residue; 6 a dadakkel a plastic sachet a nagkarga iti masuspetsa a shabu; 5 a babassit a plastic sachet a nagkarga iti mapapati a shabu; 3 improvised scoop; weighing scale, 7 a getteng; 7 a lighter; assorted a naaramat a foil; 70 a plastic sachet para repacking; 6 a selpon; ken maysa a caliber 22 revolver nga addaan tallo a bala a karga ti cylinder.

Napakatan ni Quiday iti medical examination iti Gabriela Silang General Hospital, sa naipan iti Vigan City police station agraman dagiti nakumpiska iti nakaangayan ti pot session.

Maisagsagana metten ti maikanatad a kaso a maikontra kenkuana.

Kabayatanna, tallo a lalaki ti naapput dagiti operatiba bayat ti mapapati a panagsinglotda iti maiparparit a droga iti uneg ti maysa a balay sadiay Barangay 9 ditoy siudad idi agarup 1:50 ti agsapa ti Nobiembre 4 iti insayangkatda a follow-up investigation mainaig iti pannakapapatay ti maysa a Dutchy Lucero y Torricer iti Barangay 8, Vigan City idi agarup 12:30 ti bigat ti Nobiembre 4.

Nagturong dagiti inbestigador iti balay ni Ryan Ferido y Flores, 26, a masarakan iti Barangay 9 idi agarup 1:30 a.m. ti nadakamat a petsa kalpasan a limtuad iti panagpalutpotda a sakbay ti pannakapapatayna, naggapu iti Barangay 9 ni Lucero, 37, naasawaan, ken residente iti Sitio Mindoro, San Sebastian, San Vicente, Ilocos Sur a mangsapsapul iti kalib-inna.

Naapput a madama ti pot sessionda iti uneg ti balay ni Ferido ken dagiti kaduana a nainaganan Denver Galvarez Asuncion, 18, baro, residente iti Brgy 7, Vigan City, Ilocos Sur; ken Ferdinand Mariano Aspa, 21, baro, ken residente iti Barangay 8, Vigan City.

Nakakumpiska dagiti polis iti ikut dagiti suspek iti maysa nga strip ti aluminum foil nga addaan masuspetsa a shabu residue; maysa a foil totter; maysa a lighter; ken improvised gas lamp.

Naipan dagiti nakumpiska iti Ilocos Sur Police Provincial Office Crime Laboratory para iti pannakaamirisda.

Iti pannakaisurat daytoy, maisagsaganan ti kaso maikontra kadagiti tallo a suspek.#