BANTAY, Ilocos Sur – Uppat a tattao ti nadunor iti panagdinnungpar dagiti naglugananda iti maysa a barangay ditoy.
Nadunor da Daisy Navarro, 25, naasawaan, residente iti Beddeng Daya, Vigan City; Mark Anthony Batac, 15, baro, taga-Bayubay, San Vicente, Ilocos Sur ken da An-An, 2, ken Pauline, 4, annak ni Daisy, idi naaksidenteda iti barangay road a sakup ti Zone 4 ditoy.
Segun iti report, agpalud ti chopchop motorcycle a minaneho ni Navarro, sakayna dagiti annakna idi masabatna ti honda Wave a minaneho ni Mark Anthony a kimmaut iti linia a puon ti panagdinnungpar dagiti lugan.
Naitaray dagiti agiina agraman ni Mark Anthony iti Metro Vigan Cooperative Hospital gapu iti nakaro a sugatda.
Nakaro ti dadael dagiti dua a lugan.
