4 nagsasaruno a pammaltog, naiwayat iti probinsia; 2 natay

BANTAY, Ilocos Sur – Iti baet ti nainget a pannakaiyimplementar ti election gun ban, uppat a pammaltog ti naireport a napasamak manipud idi Oktubre 6 agingga iti Oktubre 12 iti Sto. Domingo, Cabugao, Narvacan ken ditoy nga ili a nakatayan ti dua ken nakasugatan ti maysa.

Naireport a nagudas da Reynante Tagorda y Rabanal, 38, naasawaan, residente ti barangay Puerte Real idi agsapa ti Oktubre 8; ken ni Reymon Lorenzo y Blaza, 23, naasawaan, residente iti Barangay Daclapan, Cabugao, Ilocos Sur idi malem ti dayta met laeng nga aldaw.

Napapatay ni Tagorda iti uneg ti maysa a videoke bar iti Barangay Poblacion, Sto. Domingo idinto a napaltogan ni Lorenzo bayat ti panagdaliasat ti motorsiklona iti national highway a sakup ti barangay Pug-os.

Nagsagrap ni Alex Cabradilla y Keler, 33, married, laborer, iti sugat iti kanawan a paset ti bagina iti pammaltog a napasamak iti Narvacan iti agarup alas 8:00 ti rabii ti Oktubre 12 iti Narvacan.

Iti sabali a bangir, pinaltogan ti maysa a lalaki idi malem ti Oktubre 6 ni Rolando Cortez y Velasco, 39, baro. mannalon, residente iti Barangay Paing, Bantay ngem nagmintis.

Iti inisial nga inbestigasion dagiti polis ti Sto. Domingo, umin-inom ni Tagorda iti beer, kaduana ti maysa a di nainaganan a guest relation officer, idi simrek dagiti dua a suspek, nagorderda iti beer sada nagpuesto iti likudan ti biktima ken pinaltogan ti ulo ken nadumaduma a paset ti bagi daytoy.

Naglibas dagiti suspek iti dua a motorsiklo a minaneho ti dua a kaduada a nagpaay metten a lookout sada naglibas iti laud a direksion.

Nakarekobre dagiti inbestigador iti 4 kapsula a nagtaud iti cal. 45 iti nakapasamakan ti krimen.

Iti met pammaltog iti Cabugao, agdaldaliasat a nakamotorsiklo da Lorenzo, kalubbonna ni Tony Blaza y Blaza, 16, baro, kalugaran met laeng ni Lorenzo, iti national highway ket idi makadanonda iti asideg ti barangay hall ti Barangay Pug-os, pinaputokan ida dagiti suspek a nagkalubbon met iti motorsiklo ti sumagmamano a daras a nakatamaan ti nadumaduma a paset ti bagi ni Lorenzo.

Naitaray da Lorenzo ken Blaza iti Pira Clinic and Hospital ngem naideklara ni Lorenzo nga awanen ti biagna.

Di pay ammo ti motibo ti pammapatay.

Kabayatanna, riri iti nagbaetan ni Cabradilla ken dagiti suspek ti maitudo a gapu ti pannakapaltog ti biktima idi alas 8:00 ti rabii ti Oktubre 12 iti Sitio Kakaldingan, Barangay Lungog, Narvacan.

Mapapati a pinabasol da Rodel Carsola y Silva, 25, baro, mannalon ken Roland Cabaya, agpada a kalugaran met laeng ni Cabradilla, a nangibulos iti baka a kukua ni Benny Cabrera, half brother ni Cabaya a puon ti nagsubanganda.

Mapapati a bayat ti panagriringgorda, pinaltogan ni Cabaya ni Cabradilla babaen ti homemade gauge 12 buckshot ngem nagmintis. Innala ni Carsola ti paltog ken pinaputokanna ti biktima a nakasugatan iti kannawan a paset ti bagi daytoy.

Naitaray ti biktima iti Central Ilocos Sur District Hospital, Paratong, Narvacan para iti pannakaagas ti sugatna.

Inaresto dagiti polis ni Carsola iti balay ti maysa a Mauro Silva iti nasao met laeng a lugar.

Susik maipapan iti talonda ti puon ti nangpaltogan ni Eddie Castillo y Paco, 58, naasawaan, residente iti Barangay Paing, Bantay ken ni Cortez iti Barangay Paing, Bantay, Ilocos Sur. Ngem nagmintis ni Castillo iti panangpaltogna ken ni Cortez.

Naaresto ni Castillo iti uneg ti balayna iti follow-up operation nga insayangkat dagiti polis Bantay ket boluntario nga insukona ti maysa a cal. 38 revolver nga awanan iti bala a mapapati a naaramat iti pammaltog.

Imbilin itay  nabiit ni Provincial Director Eduardo Dopale ti naing-inget a panag-checkpoint dagiti polis iti babaenna iti sanguanan ti pannakapapatay ni Judge Reynaldo Lacasandile, 48, executive judge ti Vigan Regional Trial Courts Brnch 20, bayat ti panagurayna iti luganna iti igid ti national highway a sakup ti Barangay Lacong, Tagudin, Ilocos Sur idi parbangon ti Oktubre 4.

Naitabon itay Oktubre 16 ni Lacasandile nga awan pay ti natiliw a suspetsa iti pannakapapatayna. Adda pakainaiganna iti trabahona ti maysa nga anggulo a kitkitaen ti Task Group Lacasandile iti pannakapapatay ti hues.

Madama ti panangrebio ti nasao a task group kadagiti dadakkel a kaso nga iggem ti hues sakbay ti pannakapapatayna ken iti panagkalapda iti impormasion kadagiti personalidad a mabalin a makaited iti impormasion mainaig iti pammapatay ken iti nalimed nga panagimbestigada iti Sudipen, Bangar, ken Balaoan, La Union a masuspetsa a nagpaknian dagiti posible a suspek.#

Enhanced by Zemanta