Footer

4 nagudas iti nagsisina a pammapatay

BANTAY, Ilocos Sur – Uppat a tattao a pakairamanan ti maysa a baket ti nagbalin a biktima  ti kinadamsak iti nagsisina a pammaltog a napasamak iti uppat nga ili ditoy probinsia itay nabiit.

Natay gapu iti pannakapaltogda da Glenford Navarette Romo, 26, residente iti San Sebastian, San Vicente, Ilocos Sur; Dominador Salazar, 31, taga-Barangay Banglayan, Narvacan, Ilocos Sur; Amado Nicanor, residente iti San Juan, Sta. Lucia, Ilocos Sur; ken  Florentina Laeño, 50, taga-Barangay Katipunan, Sinait, Ilocos Sur.

 Natay ni Romo kalpasan a pinaltogan ti suspetsa a nainaganan Edmund Cobangbang, 26, estudiante bayat ti maysa a drinking session kadagiti kalugaranna iti maysa a kubo.

Iti inisial nga inbestigasion dagiti polis, agiinom da Romo, ken sumagmamano a kalugaranna iti kubo ti maysa a barangay tanod idi immasideg ti suspetsa ket pinaltopaltoganna ti biktima.

Nakarekobre dagiti polis iti uppat a kapsula manipud iti cal. 45.

Di pay ammo no ania ti motibo iti pammapatay.

Karabian ti kasangayna idi mapaltogan ni Salazar iti uneg ti pagtaenganna bayat ti pannanganna.

Mapapati a nagpuesto ti di pay am-ammo a suspetsa iti ruar kas maibasar iti inisial nga inbestigasion dagiti polis.

Kinuna ni Marivic, asawa ti biktima, nga awan ti ammona a kabusor ti asawana.

Kabayatanna, iti pammapatay iti Sta. Lucia, Ilocos Sur, kagapgapu ni Nicanor a nangitulod iti anakna iti eskuela ket sumrek koman iti inaladanda idi pinaltogan ti dua a di nabigbig a tattao.

Natay a dagus ti biktima gapu iti tamana iti ulo, barukong ken likud babaen ti cal. 45 ken 9mm.

Naammuan a sakbay ti pammapatay, gimmatang pay dagiti dua a suspetsa iti masaramsam iti tienda ti biktima.

Kabayatanna, di pay ammo no ania ti motibo ti pannakapapatay ni Laeño.

Segun iti inbestigasion, nakalugan ti biktima, kadakuana ti kaanakanna, iti traysikel nga agturong iti simbaan tapno makimisada idi mapaltogan.

Impatay a dagus ti biktima ti sugatna iti ulo ken likudna.#