4 naiwawa a bala, simmalput balbalay idi selebrasion Baro a Tawen

VIGAN CITY – Iti baet ti nainget a kampania ti kapolisan maikontra iti panagpaputok iti paltog iti pannakasarabo ti baro a tawen, uppat nga stray bullet ti naduktalan a simmalput iti dua a balay, maysa a panganan ken iti quarters ti maysa a doktor iti maysa a pampubliko a pagagasan a mapapati a naipaputok amin bayat ti selebrasion ti baro a tawen.

Immuna a naireport agarup 12:10 a.m. kalpasan ti isasangbay ti baro a tawen ti pannakaduktal ti maysa a naipaputok a bala iti quarters ni Dr. Rosana Besavilla, 42, naasawaan, ken residente iti Barangay VII, Vigan City, sadiay Gabriela Silang General Hospital

Segun iti polis, ti posible a trajectory ti naiwawa a bala ket manipud iti abagatan nga agpaamianan a direksion.
Idi agarup 12:45 a.m., nakaawat ti police station iti tawag manipud ken ni Isidro Bandola Benamil, Jr., 52, naasawaan, akinkukua iti Junofel Dinner’s Place ken residente iti Pantay Daya, Vigan City, a nakadiskubreda iti naipaputok a bala iti uneg ti restaurant.

Mapapati a naggapu iti abagatan ti stray bullet a mapapati a nagtaud iti cal. 9 mm ket simmalput iti atep ti restaurant.

Idi agarup 12:55 a.m., timmawag ni Beddeng Daya Barangay Captain Floro Punieg a nakaduktalda iti naiwawa a bala iti balay ni Robert Sanchez y Usana, 52, naasawaan, ken residente iti nadakamat a barangay.

Simmalput ti bala iti atep ti balay ni Sanchez.

Segun iti polis, naggapu ti naiwawa a bala iti daya nga agpalaud a direksion.

Naisubmite amin dagiti stray bullet iti Ilocos Sur Crime Laboratory Office para iti pannakaeksamenda babaen ti ballistics.

Kabayatanna, duapulo a minutos kalpasan ti alas dose idi Baro a Tawen, nakaawat ti police station ti Bantay iti report a maysa a naiwawa a bala ti simmalput iti balay ni Jovita Peria y Aquino, 71, naasawaan, ken residente iti Barangay Cabalanggan, Bantay, Ilocos Sur.

Iti panagimbestiga dagiti polis, agbuybuya da Peria iti telebision iti uneg ti balayda idi nakangegda iti nanalteek iti sim nga atep ti balay sa adda natnag iti asidegda.
Nakigtotda laengen idi makitada a maysa a deformed bullet ti nagdisso iti uneg ti balayda.

Naipatulod ti narekobre nga slug iti Provincial Crime Laboratory Office para iti ballistics examination.#